Juventude Loriku Assuwain 12 Novembru husu ba Governu atu hadia Saudozo Sebastiao Gomes nia rate tanba liu hosi sakrifiu joven ida ne’e iha 1991 mak hamosu eventu 12 Novembru dada mundu nia atensaun ba sofrimentu no atrosidades ne’ebe akontese iha rai laran.
Saudozu Sebastiao Gomes mate iha Igreja Motael, Dili, iha loron 28 outubru 1991 wainhira hetan tiru husi Militar Indonesia no durante nia serimonia hakoi joventude halao asaun demonstrasaun ne’ebe rezulta ho militares Indonesia tiru no ohon juventude barak iha Semiteriu Santa Cruz, Dili, nia ohin. Iha momentu ne’eba, iha serimonia ne’e assisti mos hosi jurnalistas estranjeiru ida, Max Sthal, ne’ebe konsegue filma massakre haruka sai video ne’e ba mundo tomak atu bele testemunha saida mak akontese iha loron massakre ne’e.
“Ami mate restu Juventude Loriku Assuwain husu ba IV Governu Konstituisaun neebe lidera husi Primeiro Ministro Kairala Xanana Gosmao atu hadia ita nia Saudozo Sebastiao nia rate tamba nia rate uluk nee mak nunee nafatin too ohin loron maibe laiha mudansa,” dehan Tomas de Jesus, membru Assosiasaun Mate Restu, iha Sentru Konvensaun Dili, semana kotuk (11/11).
De Jesus haktuir katak Saudozo Sebastiao Gomes nia mate maka hamosu 12 Novembru no ho ida nee maka hatudu ba Mundu atu loke matan hodi hare Timor-Leste nia luta.
Nunee mos Expedito Nunes hanesan autores ida ne’ebe halo planu 12 Novembru katak maluk sira ne’ebe lakon nia isin hodi defende lia los ba ukun rasik-an tamba nee husu ba Govenru atu serbisu hamutuk nafatin ho Komite 12 Novembru atu buka tuir saudozo sira seluk nia ruin seidauk hetan.
“Hau husu ba Governu atu kolabora nafatin ho Komite 12 Novembru hodi buka nafatin ita nia saudozo sira ne’ebe nia ruin seidauk hetan tamba ho sira nia mate maka ita nia rai ida hetan Independensia,” dehan Nunes.
Nia haktuir katak Sebastiao Gomes nia mate maka hamosu Masakre Santa Cruz tamba nee Governu tenki esforsu duni atu hare ba nia rate ne’ebe uluk iha tempu Indonesia too agora lahadia.
Iha fatin hanesan membru Mate Restu Virginia [apelido?] katak antes Governu halo monumentu 12 Novembru presiza hadia uluk saudozu Sebastiao Gomes nia rate.
“Hau husu ba Governu atu hadia uluk Saudozu Sebastiao nia rate antes halo monument ida ne’ebe boot tamba se Governu halo uluk monumentu ne’e maibe saudozu nia rate ne’e ho kondisaun ne’ebe uluk tempo Indonesia ne’e mak nune’e nafatin hau sente ida nee ladun diak.”
