Maske politika ne’e atu fo benefisiu ba sub-distritu 65 iha distritu 13 nian laran liu-liu kona ba infrastruktura bazikas, labarik jerasaun foun lamenta tebes ho politika ne’e tanba jerasaun foun senti sira mak sei tutur tusan ne’e iha futuru.
“Nudar reprejentante labarik iha distritu Manufahi ho Ainaro husu ba kuatru governo konstituisional atu labele deve osan husi nasaun seluk ba dezenvolvimentu rai ida ne’e tanba ami jerasaun foun mak sei tutur tusan ne’e no sai impaktu bo’ot ba nasaun no povu Timor–Leste iha futuru,” hateten Reprezentante Labarik husi Distritu Manufahi no Ainaro, Nisia Sarmentu Baptista, foin lalain (20/11) iha serimonia selebrasaun Loron Mundial ba Labarik iha Catetral Dili.
Nia rekomenda mos ba reprezentante povu iha Parlamentu Nasional atu tu’un direitamentu iha baze atu hare kualidade estrada hanesan iha Aikutu Same no Aikutu Ainaro ne’ebe sai risku bo’ot ba transporte publiku; no mos fo atensaun ba servisu agua e saneamentu iha baze ho razaun eskola barak laiha sentina no bee moos.
Alende estradas, elektrisidade mos sai nafatin perkupasaun komunidade iha baze liu-liu estudantes sira tanba elektrisidade kontinua mate fo inpaktu ba labarik sira atu estuda liu liu sira halao hela exame final trimestre.
Iha parte seluk Sonia da Conceicao hateten katak governu Timor-Leste seidauk iha divisaun lolos konaba kategoria idade labarik nian.
“Hau husu ba Governu atu difini lolos divisaun ne’e tanba halo ami labarik duvidas,” hateten Labarik da Conceicao.
Labarik marka presenza iha okaziaun ne’e os rekomenda ba Ministeriu Justisa atu servisu makas hodi aserela esbosu Lei Sistema Justisa Juvenil, Kodigu Lei Protesaun, Lei Adopsaun no Lei ne’ebe relasiona ho direitu labarik nune’e bele prevene protesaun ba direitu labarik iha rai laran ho diak.
