Objektivu ba eventu ida ne’e mak atu promove desportu ba ema hotu no laiha diskrminasaun ba ema ho disabilidade no katak ho attitude pozitiva ema ho dizabilidade mos bele halimar desportu.
“Ami mos lakohi halimar mesak deit maibe ami halimar kahor malu, ema normal no ema ho defisiente joga hamutuk hotu hodi bele hatudu ba ema hotu husi aktividade ida ne’e. Ami lakohi separasaun entre ema ne’ebe ho aleizadu ho problema fisiko ho ema sira ne’ebe isin diak,” hateten Manajer Klinika ASSERT, Nelson Da Silva, iha semana kotuk (20/11), iha Secretaria Estadu Joventude no Desportu, Sional, Dili.
Tuir Manajer da Silva, husi aktividade ida ne’e bele hamenus diskriminasaun ba ema aleizadu iha Timor-Leste .
Mananjer ne’e hatutan tan katak durante treinamentu nia laran problema ne’ebe sira infrenta mak laiha transporte atu tula defisiente sira ne’ebe husi fatin do’ok hanesan Hera mai iha Dili atu tuir treinu.
“Sira tenki sae mikrolet husi Hera mai, mak husi ASSERT selu. Se mikrolet laiha sira labele mai ida ne’e mak defikuldade primeiru ne’ebe sira hasoru. Kona ba kadeira roda mos limitadu iha 10 deit kuandu estraga sira labele halimar ona.”
Eventu bola-basket ne’e eventu angariasaun fundus no ossan ne’ebe hetan ema sosa bilhetes sei uza hodi bele sosa tan kadeira roda ne’e barak tan para bele involve tan ema.
Ba oin sira mos sei hetan tan treinamentu husi Motivation Australia husi sira nia programa Australian Sport Outreach Program.
Entertantu Martin B. Papay Jr. manajer-fundador husi Maharlika Internasional School hateten katak hanesan kompania ida, pronto atu apoio finanseiru hodi sosa kadeira roda ida pois kompania balun apoio fo osan atu tau hamutuk sosa kadeira roda, ba Governo sira mos ajuda jogador sira nia farda.
“Husi Maharlika internasional School suporta ne’ebe ami ajuda jogador. Ami nia mestre sira, depois kolega sira seluk, ami mos ajuda sira fa’an ticket hodi hetan osan atu nune’e bele sosa kadeira roda. Ami husu parente sira atu ajuda financial depois ami kontinua buka fundu atu ajuda sira hodi hola kadeira roda,” hateten Manajer Papay Jr.
