Embaixada Estado Unidos Amerika oferese ajudus osamentu ho montante $3.445 ba Organizasaun Naun Govermental (ONG) Fundasaun Fuan Foinsae ba Futuru (FFF) atu fasilita programa joventude iha area edukasaun non formal tanba liu husi programa ne’e bele halibur joventude no minimiza konflitu iha sira nia bairo laran.
“Ho ajudus ne’ebe Estado Unidus Amerika oferese atu hola komputador ba administrasaun no hadia kualidade kursu Ingles ba joventude sira,” dehan Responsabel ONG FFF, Antonio Ximenes Guterres, iha semana kotuk (4/11) iha edifisiu FFF Comoro, Dili.
Joventude hamutuk 48 fahe ba grupo baziku husi labarik sira, grupo baziku ida mai husi graduadu husi eskola sekundaria; no iha mos grupo ida husi universidade. Loron ne’ebe sira halo aprendizazen mak loron Sabadu no Domingu ba adultu sira Segunda, no Kuarta ba labarik sira.
Iha fatin hanesan, Marcelino Soares, nudar Chefe Suku Fatuhada hateten katak nia parte apresia tebes ho inisiativa joventude sira nian ne’ebe ajuda ona lider komunitaria sira atu kapasita joventude seluk hases husi konflitu tanba programa atu halo aktividade ba joventude sira ne’e responsabel lider local sira nian.
“Hau agradese tebes ba hau nia joven sira ne’ebe forma ona organizasaun ida ne’e ajuda ona hau bele mentaliza no kapasita sira nia maluk sira atu bele konserta sira nia aan”dehan Chefe Suku Fatuhada Soares.
Nia mos husu ba joven sira atu halo tan proposta ruma atu kria tan aktividade seluk hanesan desportu, tanba aktividade sira ne’e bele dezenvolve joventude sira nia mentalidade.
Iha parte seluk, estudante Jelito Freitas, hateten katak sira nia kursu lao diak maske ho kondisaun ne’ebe fasilidade limitadu hanesan treinador.
“Hau nudar estudante hau sente kontente tebes tanba Ingles ne’ebe ami aprende standar no hau sente kursu ne’e diak liu sira seluk,” dehan estudante Freitas.
ONG FFF hari iha tinan 2008-2009 ho objetivu servisu social aatu kapasita joventude sira atu sira bele hetan futuru ne’ebe naroman liu-liu sira ne’ebe oan kiak. Kustu administrasaun ne’ebe ONG FFF husu iha fulan ida, dolar rua centavus lima nulu kada estudantes hodi fasilita kondisoens aktividade Programa Kursu Ingles.
Formadus ne’ebe hetan oportunidade iha tinan 2008 agora dadaun ida iha Japaun, ida iha India no ida iha Nova Zelandia.
