The Asia Foundation (TAF) no Ajensia Estados Unidos ba Dezenvolvimentu Internasional (USAID) parseria ho Universidade Nasional Timor Lorosa’e (UNTL ) no Standford Law School halo lansamentu ba livru ho naran Etika Profesional de Direitu iha Timor-Leste atu suporta setor justisa iha rai laran liu liu pratikantes advokasia no sira ne’ebe servisu iha area judisial nian.
“Funsaun hotu Governu nian maka regula lalaok funsionario publiko sira. Iha seitor justisa regulamentu hirak ne’e impoortante tebes no presiza tebes, no nune katak importansia husi lansamentu livru dahuluk ne’e kona ba etika professional,” hateten Embaxadora Estadus Unidos America, Judith Fergin, iha iha Xanana Sport Center, Bairo Dos Grilos, iha Dili, durante serimonia lansamentu livru semana kotuk (10 /11).
Tuir Embaxadora Fergin katak, livru ne’e, “analiza kona ba ema Timor sira nia lei kona ba etika profesional ne’ebe sei inklui mos kona ba funsionario publiko, prokurador, defensor publiko, Majistradu, no Advogado privadu sira.”
Livru ne’e sirkula iha lian Tetun, Portugues, no mos Ingles no espera katak livru sira ne’e sei uza iha Educasaun legal iha Universidade sira iha nasaun laran no mos iha programa treinamentu sira ne’ebe asusia ho Sentru Formasaun Judisial (SFJ).
Entretantu Reitor Stanford Law School, iha America, Larry Kramer, hateten katak husi partisipasaun povu nian iha kontitusionalidade nasaun ne’e nian maka importante.
“Husi buat hotu-hotu, partisipasaun povu nian mak importante iha kontitusionalidade demokratika, tamba sira maka sai hanesan benefisiarius ikus nian,” hateten Reitor Kramer.
Iha parte seluk Prezidente Tribunal De Rekursu, Claudio Ximenes, sujere atu volume dahuluk ba Textu livru ne’e tenki fokus ba etika professional atu nune bele “hametin responsablidade professional no etika legal iha Timor-Leste.”
Serimonia lansamentu livru ne’e remata Professor Larry Kramer no Diretor TAF Silas Everett entrega livru ne’ebe hakerek iha lian Portugues, Ingles no Tetun ba Reitor Universidade Nasional Timor Loro Sa’e (UNTL) Dr. Aurelio Guterres.
