Estudante Secundaria no 4 de Setembro lamenta ho prosesu apredizazen tanba maske tur izame nasional maibé sira nia eskola falta materia barak.
“Ami lamenta tebes ho prosesu apredizazen ne’e, besik izame agora ami estuda saida, material ne’ebé mak ami hetan ladun kompletu, semana ida ami eskola, semana ida fali ami diskansa iha uma. Hanesan ami Mahasiswa fali, Mahasiswa sira mos eskola tuir oras, ami nian lae halo tuir ema servisu presiza diskansa iha uma, agora ami mak hetan difikuldade bo’ot wainhira prepara ba izame,” Octaviana Bareto Moniz hateten semana kotuk (11/11) ne’e iha ninia eskola Balide Dili.
Tuir Estudante Octaviana, atu halo rehabilitasaun ba eskola diak liu halo wainhira estudante sira ne’e friadu, ou izame ne’e hotu, atu nune’e labele difikulta estudante sira atu simu materia husi eskola. Sekukandu hanesan ne’e estudante sira mak perkupa bo’ot ba izame, agora estudante sira atu estuda saida sekuandu laiha materia kompletu.
Estudante 4 de Setembro semana ida eskola no semana ida lae, razaun katak Ministeiru Edukasaun halo rehabilitasaun ba sala, tuir Octaviana ida ne’e laos razaun, tanba durante ne’e estudante sira simu materia diak hela husi eskola, wainhira hetan rehabilitasaun husi Ministeiru Edukasaun sai difikuldade bo’ot ba estudante sira.
Hatan ba perkupasaun estudante sira nian, Vice Director da Escola 4 de Setembro UNAMET, Francisco da Costa Fernandes rekonhese duni problema estudantes sira refere, no ida ne’e sai difikuldade iha trimester ida ne’e nia laran.
“Iha trimester ida ne’e nia laran ami hetan difikuldade barak, difikuldade sira ne’e tanba husi Ministeiru Edukasaun halo rehablitasaun konaba eskola nomós hetan azuda husi Governu Timor-Leste liu husi Embaixada Estadu Unidus ninian, tanba ne’e mak difikulta ami iha prosesu aprizazen ninian,” hateten Vice Director Fernandes.
Tuir Vice Director katak, lolos ne’e estudante sira uza sala 24 ba estudante sira ne’ebé mak eskola dader inklui mos loraik, maibé tanba sala 16 hetan rehabilitasaun husi Ministeiru Edukasaun, eskola ne’e implimenta semana sim semana náo ba estudante sira, liu-liu ba estudante primeiru no segundu ano sira, ba estudante terseiru ano sira hola parte ba izame nacional entaun sira loron tomak simu materia lao hanesan bain-bain.
Nia hateten, depois de hetan rehabilitasaun hotu, Ministeiru Edukasaun intrega fila fali sala ne’en ba eskola tanba ne’e maka agora dadaun estudante sira komesa eskola hanesan normal, no prossesu aprendizazen lao normal hanesan bain-bain.
