Dala barak inan-aman inklui mestra/e sira eduka labarik sira ho uza violensia no atitude ida ne’e tuir lolos labele uza ona hodi eduka labarik tanba agora dadaun ita presiza hahu respeita direitu labarik sira nian no proteje sira nia dignidade.
Estudante Primaria no 2 Solidariedade Vila-Verde, Florida Aitara Pereira, tinan 10, hatete, eduka labarik sira atu sai matenek laos uza violensia tanba dala ruma labarik sira trauma ho atitude hanesan ne’e.
“Eduka ami laos lori violensia. Ho violensia laos dalan para hadiah ami nia future. Violensia mak habadak ami nia futuru ba oin, tanba dala ruma labarik balun trauma se wainhira iha inan aman ou mesta/e balun eduka sira ho violensia. Violensia sei la resolve problema,” estudante Pereira hateten iha semana kotuk (11/11) iha nia eskola fatin iha Vila-Verde, Dili.
Estudante Pereira hanesan oan ba dala-hat husi maun alin nain ne’en konsidera katak dala barak inan-aman sira sempre baku sira nia oan, sekuandu labarik ne’e halimar demais e dala ruma nia parte senti triste wainhira hare labarik ho idade sei kiik inan aman obriga fa’an sasan.
“Tuir lolos ami labarik nia servisu mak estuda, halimar, inklui ajuda inan aman, maibé laos atu buka fali osan hodi sustenta nesesidade familia nian, tanba ne’e servisu inan-aman nian,” katak estudante Pereira.
Iha parte seluk, Diana da Costa nudar mos estudante Primaria N. 2 Vila-Verde, konsidera katak labarik tenki prepara atu moris nu’udar ema mesak ida iha sosiedade nia laran, no habo’ot ho esprítu ne’ebé proklama tiha iha karta Nasoins Unidas nian, no liu-liu ho esprítu dame, dignidade, toleránsia, liberdade, igualdade, no solidariedade nian.
“Hau hanoin ami labarik presiza moris iha komunidade sira nia le’et ne’ebé mak iha dame, tanba labarik presiza dame laos violensia,” hateten estudante Diana.
Koalia konaba direitu labarik fiar metin katak, familia hanesan grupu fundamental sosiedade nian no hanesan ambiente natural ba dezenvolvimentu no moris diak membru familia nian liu-liu ba labarik sira, tenki hetan protesaun no tulun ne’ebé presiza atu nune’e familia iha kapasidade atu simu responsabilidade ne’e iha komunidade nia laran.
