“Ba hau loron ne’e [3 Novembru] importante tanba hanesan vitoria ba libertasaun nasaun Timor no marka istoria ba feto Timor katak luta hodi uluk hodi wain kedas hatudu duni nia asuwai ba mundu tomak. Dalabarak ema dehan feto mate ho kanedok maibe feto maluk ida ne’e mate ho kilat. Ita tenke orguillo no mate ho prinsipiu ida katak hakarak rai ne’e ukun rasik aan no be oan sira moris ho hakmatek,” hateten Filomena Barros dos Reis, aktivista Direitus Umanus Timoroan seman kotuk (4/11), iha Caicoli, Dili.
Aktivista Reis hatutan katak maske nasaun ne’e sei moris buka atu dezenvolve liu ba oin maske la perfeitu maibe bele sai modelu ba jerasaun foun sira. Nia husu ba inan feto sira lalika laran taridu bainhira hetan dezafiu maibe foti matan hateke ba Maromak no ba maluk sira ne’ebe fo apoiu no fo liman ba malu lao ba oin no lalika tauk bainhira halo buat ruma ba estabilidade nasaun nian.
Ministra Solidaridade Sosial (MSS), Maria Domingas Alves, hateten katak loron 3 de Novembrum, Loron Nasional Fetor Timor-Leste, importante tebes ba feto tanba loron ne’e hatudu ba mundu tomak katak partisipasaun feto hahu husi luta rezistensia.
“Ita kontente ho loron nasional ida ne’e ita tenke firmi nafatin hatudu ita nia disiplina no kapasidade, fo koarajen ba feto maluk sira liu-liu sira iha area rurais,” dehan Ministra Alves hafoin tuir selebrasaun Loron Nasional Feto Timor Leste.
Iha fatin hanesan Directora Organizasaun Non Govermental CAUCUS, Julieta Ferreira da Silva hateten katak selebrasaun loron nasional Feto importante tebes ba feto Timor–Leste sira tanba iha loron ne’e bele hanoin fali sakrifisiu ne’ebe feto sira halo iha tempu passadu no feto Timoroan bele dezenvolve aan hodi luta nafatin hodi hetan libertasaun no susesu iha futuro.
Iha oportunidade ne’e Diretora da Silva hato’o mensagen ba feto Timoroan sira katak dezenvolve aan hamutuk mane sira tanba nasaun ne’e ba oin presiza feto no mane nia luta.
