Prezidente Tribunal Rekursus (TR), Claudio Ximenes, hateten katak oho ema krime ida todan teb-tebes no lei klaru kona ba krimi oho ema ka halo kanek ema nia isin.
“Iha prosesu ida ne’e imi nain hat oho ema nain rua. Tribunal hatene katak imi oho Bimeta no Boe Ana tamba imi fiar katak sira ema buan no imi fiar katak ema buan iha poder atu halo ema seluk moras ka mate,” hateten Prezidente TR Ximenes semana kotuk (9/11) iha TR, iha Caicoli, Dili.
Tuir Prezidente Ximenes se mak iha buat ruma hasoru ema ruma no hanoin katak ema tenki hetan kastigo tenki ba kesar ba polisi ka ba prokurador hodi halao prosesu atu fo kastigo ba ema ne’e. Nia haktuir tan katak Estadu deit mak bele fo kastigo; ema ida ida labele fo kastigo ba ema seluk.
Tuir faktus kazu ne’e, arguido nain hat, Gilberto Lopes, Carlito de Jesus, Saturnino Soares, no Bendito Pinto Nunes, oho ema nain rua, Bimeta ho tinan 60, no Boe Ana, ho 60 anos hanesan, tanba sira hanoin katak ferik rua ne’e kaer aimoruk atu halo aat ema.
Hosi arguidos nain hat ne’e arguido Lopes hetan 15 anos komarka tanba nia mak orkestrador, katak nia mak haruka arguidos De Jesus no Nunes, oho ferik rua ne’e iha kazu homisidio duplo ne’e. Iha loron 6 Novembru 2009, arguido Lopes dehan ba arguido de Jesus no Nunes katak nia sei fo US$50 ba sira se sira ohon vitimas Bimeta no Boe Ana tanba nia konsidera sira nain rua kaer Aimoruk buan nian.
Ho ida ne’e arguidos konsegues duni ohon vitimas Bimeta no Boe Ana ho violensia no terus makas.
Aguidos sira seluk De Jesus hetan pena mesak prizaun tinan 10, arguido Soares Tribunal kondena ho pena mesak tinan 8, no arguido Nunes Tribunal kondena ho pena mesak tinan 5.
Prezidente TR Ximenes hatetan tan ba arguidos nain hat ne’e no mos hato’o lia menon ba sosiedade tomak atu labele haluha katak lei bandu ema hotu hotu atu oho no labele halo kanek ema nia isin no katak krimi oho ne’e kazu krime ne’ebe bo’ot teb tebes.
Akontesimentu homisidia akontese iha dia 9 Novembru 2009 iha Distritu Liquisa , Sub Distritu Maubara, Suku Uatu Bou, Aldeia Lisa Ico.
