Uma Hakmatek PRADET ne’ebe harii iha tinan 2003 ho objetivu atu hapara violensia, hametin rede referal, foti ema nia dignidade no buka lia los prontu atu fo asistensia ba kualker vitima ne’ebe refere husi Polisia VPU ka familia sira durante 24 oras maibe laos permanente tanba tuir regra ne’ebe iha.
“Ami simu kualker vitima hanesan vitima Violensia Domestika, Violensia Seksual no kazu urjenti ne’ebe refere husi se deit ami prontu atu fo supporta vitima sira iha fatin hakmatek ida ne’e durante 24 oras” dehan Kordenadoor Uma Hakmatek PRADET, Luiza Marçal, foin lalais (14/11) iha edifisiu Pradet, iha Bidau.
Nia hatutan katak vitima hotu-hotu sei la hetan siguransa permanente iha Uma Hakmatek PRADET nian. Vitima sei fila fali bainhira hetan atendementu hanesan tratamentu medico, examinasaun forensik no konseling maibe vitima ne’ebe mai husi Distritu no sira ne’ebe sente laseguru iha familia sei hela iha Uma Hakmatek PRADET durante kalan ida. Depois PRADET bele haruka ba iha uma mahon seluk hanesan Fokupers, Ismaik no Casa Vida.
Tuir dadus estatistika ne’ebe uma hakmatek iha katak husi fulan Janeiru to’o agora maioria husi vitima violensia domestika hamutuk 122, vitima Violensia Seksual hamutuk 48, compostu husi abuzu fisiku hamutuk nain 8, incesto nain 7, trauma nain 1 no Abandona familia nain 17. Total hamutuk 203 vitimas.
Nia informa katak uma hakmatek durante semana ida simu vitima nain hitu dala ruma menus. Maioria husi Distritu Dili tanba ho situasaun real ne’ebe iha nune’e mos Distritu seluk dala ruma vitima nain ida ka rua durante fulan ida. No pesoal uma hakmatek sei visita vitima iha sira nia uma hodi hatene problema bainhira vitima fila ba uma.
Uma hakmatek mos halao ona sosializasaun ba prevensaun violensia domestika iha 13 Distritus no sub-distritu maibe na realidade feto barak seidauk hatene katak violensia domestika ne’e krime publiku sira hatene mak violensia domestika ne’e problema uma laran entau presiza atu fo informasaun liu husi media sira ne’ebe iha rai laran atu nune’e sira bele komprende saida mak violensia domestika.
Nia rekoinese katak violensia domestika no seksual sempre akontese iha suku sira entau uma hakmatek iha planu halao terinamentu involve mos lider komunitaria sira atu nune’e bele habelar informasaun ba komunidade hotu.
