Maske Posto Unidade Batalhao Ordem Publiko (BOP), PNTL, kondisaun a’at maibe ajentes polisian ne’e nafatin servisu ho buat ne’ebe iha hodi atu fo seguransa ba komunidade atu no pronto atu enfrenta situasaun ne’ebe deit mosu iha Distritu Baucau.
“Ida ne’e situasaun ne’ebe ami hasoru nudar Timoroan. Ami esforsu nafatin maske kondisaun ladiak mas ami nia knar ami tenki servisu ho buat ne’ebe iha labele hein deit kondisaun diak mak servisu,” hateten Inspector BOP Carlos Cabral Quintas, semana kotuk (3/11) iha nia knar fatin iha Bahu, Distritu Baucau.
Tuir Inspector Cabral edifisio Postu BOP ne’e rasik hari kedas iha Tempo Indonesia nian no sira komesa servisu iha fatin ne’e iha dia 1 de julho 2002 to’o ohin loron.
Tuir Inspector ne’e mos katak bainhira udan tau tama deit iha sira nia edifisio tamba kalen no plafon husi edifisio ne’e dodok no monu hotu ona, hela kalen deit mak sei iha maibe kalen ne’e iha ne’e mos kuak hotu ona.
“Proposta ami hatama ona ba Komandante Jeral; husi Komandante Unidade hatama hotu ona ba Komandante Jeral polisia nian tamba desizaun husi Komandante Jeral mak sei deside ba ami nia necessesidade,” haktuir Inspector Cabral.
Nia hatutan tan katak tuir informasaun ne’ebe nia hetan liu hosi Orsamentu Jeral 2012 mak sei ezekuta atu halo reabilitasaun ba edifisio ne’e ka atu harii foun fali mos Komandante Jeral mak sei deside.
“Ami prontu atu simu atu buat ne’ebe iha tamba ida ne’e desizaun Komandante nian.”
Entertantu ajente polisi ne’ebe la kohi fo sai nia identidade kompletu hateten katak maske sira nia postu ne’e a’at maibe sira nafatin servisu ho buat ne’ebe mak iha.
“Ami nafatin halao servisu hodi fo seguransa ba komunidade sira bainhira iha problema ruma iha komunidade sira nia le’et. Ami bele halo atuasaun lalais ba ami fatin atu oinsa mos servisu deit.”
Tuir Ajente ne’e laos ida ne’e deit mak sira hasoru maibe fatin atu toba mos janela la iha, sira hodi ai kabelak mak hodi sata netik bainhira sira toba kalan.
Tuir observasaun TDW Postu BOP nia uma nia tatis monu hotu, plafon mos kuak hotu, janela mos nia kondisaun ladiak hotu, no fatin atu tein nia mos ladun diak.
