Husi fulan Setembru 2010 to’o fulan Outubru 2011 Fundasaun Educasaun Komunidade Matebian (FEKM) Baucau fo asistensia legal ba vitima no suspeito hamutuk 321 ba kazu krime. Hosi kazus ne’e rezolve ona 66 kazus no seidauk rezolve kazus 255.
Tuir Director FEKM Lino lopes, sira atende kazu ne’e ba vitima no suspeitu involve iha kazu krimi hanesan kazu baku malu jeraL, violensia domestika, ema lanu iha komunidade, konflitu jeral, violensia sexsual, ofensas korporais, kazu homesido no seluk tan.
“Ami mos atende kazu sobre kazu arguidu no suspeito, no dala barak ami mos akompanha sira ba tribunal halo defesa ba sira. Iha tribunal defende vitima kuandu vitima nia dadus seidauk kompletu bainhira kanek iha,” hateten Lopes, semana kotuk (3/11), iha nia knar fatin iha Kota Baru, Baucau.
Entertantu laos atende kazu arguido no suspeito maibe FEKM mos lori ema ba Hospital Referal Baucau para bele hetan atendementu asistensia saude nian no para bele hetan evidensia fizika para bele halo prova atu bele aprezenta ba Tribunal.
Tuir Director Lopes katak bainhira kazu krime la dun grave sira servisu hamutk hotu ho Chefe Suku sira ne’ebe iha setor Leste, Regiao Baucau nian, no ho Tribunal Distritu Baucau nian, polisia, Administradores Distritu no Sub-Distritu no mos ho organizasaun sira seluk hodi halao mediasaun entre partes lezadas rua maibe wainhira la konsegue hetan rezultadu diak ba partes rua, kontinua ba tuir prosedimentu kriminal nian.
“Ami fo asistensia ba vitima, lolos ida ne’e servisu polisia ninian no prokuradoria ninian tamba iha parte ida bainhira kazu ne’e akontese polisia ladun fo atensaun diak atu halo advokasia ba kazu ne’e,” nia hatutan.
Iha parte seluk Rosalina Freitas nudar komunidade hateten katak los duni iha parte ida dala ruma polisia sira no prokuradoria ladun fo atensaun diak atu halo advokasia ba komunidade nia kazu.
“Ami buka fali organizasaun seluk. Ema seluk ne’ebe iha hanoin atu bele ajuda hodi fo asistensia ba ami bainhira kazu ne’e akontese sira bele rezolve problema ne’ebe mak ami hasoru,” hateten Komunidade Fretias.
Nia haktuir katak nudar vitima ida tenki hamutuk ho advogadu ka defensor publiku e sira laiha kondisaun finanseira hodi hetan advogadu .
FEKM Baucau hari iha 2001 no hare liu ba area Educasaun maibe iha 2005 sira hahu servisu efetivo iha area justisa liu liu atu fo asistensia legal ba vitima no suspeito ne’ebe laiha kondisaun finanseira hodi hetan advogadu.
