UNICEF Organiza Diskusaun Anual Revizaun Implementasaun Protesaun Direitu Labarik

UNICEF liu husi Diresaun Protesaun Direitu Labarik organiza diskusaun ida ho Komisaun Direitu Labarik no Diresaun Nasional de Rensersaun Social kona ba rezultadu anual revizaun implementasaun direitu labarik iha tinan 2010, hare espesifikamente kona ba protesaun ba labarik iha Timor-Leste.
“Hau hanoin sorumutu ne’e inportante tebes ba hau atu hato’o relatoriu katak programa saida mak ami implementa ona no saida mak seidauk inplementa, tanba sa mak la inplementa, ba UNICEF nudar parseiru ne’ebe fo ajudus ba Komisaun Direitu Labarik liu-liu osamentu. No hau bele husu apoiu ba maluk sira ne’ebe ami servisu hamutuk hodi halo servisu diak liu tan,” dehan Komisaria Komisaun Direitus Labarik, Adalgiza Soares Ximenes, semana kotuk (10/11), iha Centru Jovenil, iha Taibesi, Dili.

Iha fatin hanesan Directora Diresaun Nasional de Rensersaun Sosial, hosi Ministerio Solidariedade Sosial (MSS),  Antonia Carmen da Cruz, hateten katak durante ne’e sira hetan apoiu tekniku husi UNICEF kona ba oinsa halao treinamentu ba agentes protesaun  labarik atu hare ba labarik sira ne’ebe iha risku ba Violasaun Seksual, Violasaun Domestika, abuzu no seluk tan no halo rede protesaun iha distritu hotu-hotu. Alende ne’e MSS mos servisu ho Ministeriu Justisa kona ba labarik sira ne’ebe iha kazu resisto moris nian.
“Ami servisu ba protesaun labarik ami presiza lei ne’ebe fo dalan mai ami hanesan Lei  Justisa Juvenil, entaun ami halo kordenasaun ho Ministeriu Justisa para lei ne’e iha lalais. No lei ba adopsaun ho programa sira ne’e presiza kapasidade entau UNICEF oferese treinamentu ba Ofisial Protesaun ba Labarik (OPL) sira hodi hasae sira nia kuinesementu ba protesaun,” dehan Directora da Cruz.
Nia hatutan katak sorumutu ne’e organija husi UNICEF no  inportante tebes ba parseitu sira atu hare saida mak implementa ona iha tinan kotuk mak sira konsege kria ona rede protesaun labarik ne’ebe involve husi membru OPL, Saude, Edukasaun no Polisia VPU sira ne’ebe durante ne’e servisu diak. No mos hare planu no estratejia saida mak sei implementa iha tinan 2012.
Sorumutu ne’e partisipa husi Komisaun Direitu Labarik, liu hosi Komisaria Adalgiza Ximenes, Directora Diresaun Nasional de Rensersaun Social MSS Antonia Carmen da Cruz, no membru OPL husi distritus sanulu-resin-tolu iha rai laran.