Atu minimiza dezemprego iha rai laran no redus trabailhador estranjeiru servisu iha Timor-Leste, Sekretaria Estado da Formasaun Profesional e Empregu (SEFOPE) asina nota atendementu dala ikus ho parseiru komunidade dezenvolvimentu lima atu implementa programa joventude nian atu kapasita no prepara joventude ba dezenvolvimentu nasional.
“SEFOPE nia planu atu haforsa parseiru sira atu fo formasaun ba joventude sira no hasae sira nia kapasidade iha area oi-oin no tinan ida ne’e remata ona katak osamentu ba area formasaun ohin kompleta ona 100% ezekuta agora hein deit rezultadu husi parseiru sira,” dehan Director Nasional Formasaun Profesional, Albano Salem, semana (10/11) iha Salaun Enkontru SEFOPE, iha Caicoli, Dili.
Director Salem hatutan katak area formasaun ne’ebe parseiru sira implementa inklui Agrikultura, Peskas, Soldadura, Konstrusaun, Tekniku-Elektrisidade, Lingua no Komputadores.
Parseiru komunidade dezenvolvimentu lima mak foin hetan suporta hosi SEFOPE mak Fundasaun ETADEP $19,012.50, Fundasaun Siao $10,000.00, Centru for masaun Komunidade Soldadura $28,127.00, Ingrin $26,170.50, Companhia Arvec Agency Unipesoal LDA $48,800.00. Hamutuk parseiru lima ne’e hetan total $132,110.00 no bazeia ba osamentu dezenvolvementu umanu 2011 ne’ebe aloka ba SEFOPE.
Tuir planu ne’ebe SEFOPE iha katak parte SEFOPE liu husi Diresaun Formasaun Professional sei halao monitorizasaun ba implementasaun parseiru sira nian iha treinu atu bele garantia rezultadu ne’e hakarak hetan liu hosi suporta ne’e.
