“Hau iha prinsipiu ida katak Premio mak bainhira halo transformasaun iha komunidade nia moris ne’e hanesan premiu bo’ot ba hau tanba ita nia servisu ne’e laos bailet deit,” hateten Premiada Reis nudar manan nain ba premiu N-Peace, semana kotuk (4/11), iha edifisiu UNMIT Obrigado Baracks, iha Caicoli, Dili.
Reis ho modestia hateten katak nia la merese atu simu premiu ne’e tanba servisu ne’ebe nia halo seidauk iha mudansa ne’ebe bruska atu muda komunidade nia moris tanba feto maluk barak sei halerik nafatin ba justisa, maibe hakarak la kohi nia simu nafatin premiu ne’e tanba laos rekuinese husi rai laran deit maibe husi rai liur hotu.
Premiada ne’e mos hato’o nia sentimentu katak nia sente orguillo tanba nudar feto nia luta la saugati no nia sente triste bainhira hetan premiu la akompania husi nia inan aman ne’ebe durante ne’e suporta nia.
“Hau nia sentimentu kahur deit katak sente orguillo tanba nudar feto ita nia luta la saugati maibe ba feto maluk sira ne’ebe servisu fo aan mate sira la hetan buat ne’ebe sira hakarak no sira seidauk hetan justisa ne’ebe justu ba sira nia familia no sira nia oan ita hare katak justisa la iha. Segundu triste tanba hau nia inan aman ne’ebe durante ne’e akompania hau la asiste premiu ne’ebe hau simu.”
Nia hatutan tan katak premiu ne’e hanesan knaha todan ida iha nia kabas maibe nia sei lapara ho premiu ne’e bainhira seidauk taka matan, nia sei koalia nafatin lia los no suporta nafatin feto maluk sira ne’ebe seidauk hetan justisa ne’ebe justu ba sira nia familia no oan.
Iha parte seluk, Directora Ezekutiva Rede Feto, Yasinta Lujina, hateten katak premiu ne’e hanesan onra bo’ot ida ba feto Timor tanba Premiada Reis pretense ba iha rede feto no movimentu feto Timor-Leste nian, nune’e mos nudar reprezentante Feto Timor ne’ebe halao duni knaar hanesan feto Timor ne’be bele kria duni paz no dame iha komunidade.
“Rede feto hanesan mahon ba feto Timor-Leste ami mos orgullo no parabens ba Sra. Filomena Reis ne’ebe hetan ona premiu N-Peace,” dehan Directora Lujina.
Nia hatutan katak premiu ne’e inportante tebes tanba bele enkoraja feto Timor-Leste sira atu bele partisipa diak lui iha area hotu–hotu laos iha setor ida deit liu-liu iha papel feto.
Feto husi rejiaun Asiatico nain hat ne’ebe simu premiu N-Peace mak hanesan, Filomena Barros dos Reis husi Timor –Leste, Purna Shova Chitrakar husi Nepal, Electronita Daun husi Indonesia, no Sheen Abdul Saroor husi Sri Lanka, nudar mulheres nain hat ne’ebe halao sira nia servisu iha nivel komunidade no nasional oferese ona sira nia aan atende ba konflitu nune’e mos consilia ba paz.
Liu husi feto 225 nebe sai nudar lideransa komunidade nian iha area prevensaun konflitu, resolusaun ba iha konflitu, rekostrusaun pos crize no paz, partisipa iha rede Servisu N- peace no halo komunikasaun on-line no halo konsultasaun direitamente hodi fahe sira nia esperensia no estrategia hodi halo advokasia, promove no manutensaun ba iha paz iha sira nia pais.
Rede Servisu N- Peace lansadu iha fulan Outubru 2010 hodi marka aniversario de dez anos do Conselho de Seguransa Nasoes Unidas, liu-liu resolusaun 1325 ba conselho sobre mulheres, paz e seguransa.
Premiadas nain hat ne’e hola parte iha rede multi pais nian ne’ebe kuinesido ho naran N-Peace Engage for peace, Equality, access, Community and Empowerment (envolve hamutuk hodi hari’i paz, igualidade, assesu, komunidade no fo kbi’it), konsultasaun iha Bangkok, nudar reuniaun annual segundu husi N- peace, fasilita husi UNDP kolabora ho organizasaun non govermental Search for common Ground, no hetan mos apoiu husi AusAID.
