Tuir Vise Ministru Ministerio Negosius Estranjeirus (MNE) katak Orsamentu Jeral do Estadu (OJE) ba ministeriu ne’e iha tinan 2012 porvolta 20 milloens tanba hodi hasae ba subsidiu Embaisada sira no mos atu harii edifisiu Ministeriu Negosiu Estranjeiru iha rai liur.
“Sae tanba ita sei loke tan Embaisada iha Vietnam, ne’e mak persija tan osan,” hateten Vise Ministru MNE, Alberto Xavier Carlos, iha Parlamentu Nasional foin dadauk (21/10), iha Dili.
VM MNE Carlos hateten katak iha OJE 2012 inklui mos montante ajuda ba nasaun sira seluk no mos hodi hare mos ba kontribuisaun ba Komunidade Paizes Lingua Portuguesa (CPLP) ninian.
Entertantu Deputadu Paul Martins, CNRT, Komisaun B ne’ebe mak trata asuntu Defeza, Siguransa no Negosiu Estranjeiru hateten katak foin dau-dauk MNE halo Audensia ho komisaun B katak iha OJE 2012 prioridade liu mak hodi prepara rekursu humanus atu Timor-Leste bele tama ba ASEAN.
“Ida seluk mak hanoin atu monta dadauk Sekretariadu Asean nian iha Dili, iha Memorial Hall iha Farol.
Deputado Martins haktuir katak atu sai membru ASEAN tenki prepara meios nebe adekuadu para bele tama iha ASEAN.
“Sira ho Indonesia hare para oinsa atu rezolve mos markasaun teritoriu Timor-Leste ho Indonesia nian.”
Deputado ne’e haktuir katak iha OJE 2012 ba MNE nian katak atu harii mos Konsuladu ne’ebe importante, atu hola rai iha Bali hodi halo uma no mos iha rai balun nebe halo tiha ona atu halo ona uma.
“Ne’e mak orsamentu tinan sira nia sae makas. Tinan ne’e besik vinte Milloens.”
Deputado Martins hateten objetivu OJE 2012 ba MNE sae hodi halo uma no instalasoens ba Ministeriu Negosiu Estranjeiru nian iha rai laran no mos iha rai liur.
