Membrus Parlamentu Nasional, bankada FRETILIN hateten katak planu Governu mal feitu atu lori ukun nia rezultadu la iha tanba be kontinua suli estraga iha fatin barak, maske komunidade iha fatin balun hakilar nafatin atu bele hetan assessu ba be mos.
“To’o agora ita hare NGO mak bergerak barak liu, ita nia Governu nonok deit, hateten Deputadu Joaquin dos Santos, iha Parlamentu Nasional, Dili, foin lalais (28/10).
Deputadu dos Santos hateten katak iha tempu udan ita sei kontenti oituan tanba be mai barak, maibe tempu bai loron be komesa menus tan departamentu governu responsavel lakon kapasidade atu regula rede distribuisaun be.
“Entau tenki kria alternativa ida para hetan tan be, ida ne’e Governu la halo, labele hanoin ke’e posu, labele hanoin deit dada deit be matan husi foho leten mak tun mai.”
Deputadu ne’e hatutan tan katak Governu iha ossan atu bele kria kondisaun, maibe nia mos kestiona karik Governu mak lahatene ou hatene mak la kohi halo.
“Meta politika ne’ebe ita atrasa la konsege, pur ezemplu hanesan atu ema hotu-hotu iha Dili laran, iha tinan lima nia laran hau ukun, hotu hotu labele hakilar tan be la iha, sira halo komprimisiu ida ne’e mas la kompri ida,” haktuir tan Deputadu dos Santos.
Entertantu Deputadu Francisco de Araujo, ASDT, hateten katak be kontinua suli arbiru deit tanba ministeriu kompetente la dun tau atensaun diak.
“Dala ruma komunidade balun susar ba be mos, maibe iha bairo balun be abandona hela entau sira nia agrupamentu ou sira nia mapeamentu, sira nia lalaok atu tun ba hare be hodi halo kanalijasaun mak la to’o iha komunidade atu uza.”
Nia esplika tan katak fatin ne’ebe povu menus be barak, no fatin ne’ebe ema hela barak be la iha tanba Servisu Agua Saneamentu (SAS) ninan sidauk halao nia servisu indireita ba los.
“Be atu ba komunidade hotu-hotu, primeiru estar kanalizasaun be tenki hare ba substansia nebe mak povu hela atu nune’e komunidade halao ba nia nesesidade loro-loron,” hateten Deputadu de Araujo.
TDW koko konfirma asuntu ne’e ba iha Diretor Jeral Agua e Saneamentu maibe la konsege tanba desloka tiha ba Distritu.
