Timor-Leste Police Development Program (TLPDP) reforsa tan servisu organizasaun ba Feto FOKUPERS nian hodi intrega ekipamentus Computador 2, USB 10, Printer 2, HVS kaisa 7 no Toner Printer 4 tanba organizasaun ne’e fo asistensia no atendementu ba vitima no oan sira husi violensia bazeia ba jeneru iha Timor-Leste, inklui mos hamahon vitima no oan hodi sira bele hein prosesu justisa.
“Hau kontenti teb-tebes ho ajudu ne’ebé mak TLPDP ofrese ba FOKUPERS tanba ho ajudus sira ne’e bele reforsa diak liu tan servisu FOKUPERS nian. Hare ba numeru violensia bazeia ba jeneru aumenta ba bebeik, TLPDP iha hanoin atu reforsa liu tan servisu asistensia ba vitima. Iha tinan ida ne’e FOKUPERS komesa hahu servisu hamutuk ho TLPDP,” hateten Diretora Ezekutiva FOKUPERS Maria Barreto foin lalais (26/10) durante seremonia intrega ekipamentus hosi TLPDP hala’o iha salaun FOKUPERS, iha Farol, Dili.
Diretora Barreto haktuir katak TLPDP laos foin mak ajuda FoKUPERS maibe iha tinan 2010 hahu suporta fundus ba nia organizasaun hanesan suport reabilitasaun uma mahon ba vitima, suporta fasilidade ba shelter, no suporta fundus ba kapasitasaun staff konseling atu tuir formasaun iha Indonesia.
“Ita hare ba numeru kazu husi Policia Nacional VPU [Unidade ba Ema Vulneravel], inklui mós policia VPU husi Distritu hotu-hotu, ne’ebé hatudu katak numeru violensia bazeia ba jeneru nunka mais menus maibé aumenta aas ba bebeik. Maibé fatin uma mahun la susfisiente atu simu vitima sira, ho esforsu makas FOKUPERS buka meios halo nusa hodi rezolve problema ida ne’e,” hateten Diretora Barreto.
Nia haktuir tan katak TLPDP ninia programa importante mak reforsa diak liu tan programa xave organizasaun nian kona ba Asistensia ba Vitima sira.
Iha parte seluk Melita Zielonko, servisu iha TLPDP iha Programas ba Jender no Ema Vulneravel [Gender and Vulnerable Persons Programs] dehan katak TLPDP sei reforsa diak liu tan servisu FOKUPERS nian tanba tuir nia hare katak programa ne’ebé mak organizasaun ba feto ne’e hala’o dadaun diak tebes hodi fo asistensia ba vitima sira.
“Ami hakarak hadia servisu NGO ida ne’e nian, tanba tuir ami nia hare programa NGO ne’e nian bele fo asistensia ba vitima sira. E ami mos husu ba maluk Timoroan sira seluk atu fo kolaborasaun hamutuk hodi hamenus numeru violensia bazeia ba jender. Ita hare realidade numeru aumenta ba bebeik.”
Iha parte hanesan Superintendente TLPDP, Steve Mewbrun hateten, numeru violensia bazeia ba jender iha Timor-Leste aumenta aas teb-tebes kompara ho nasaun seluk, tan ne’e sira presiza rezolve problema ne’ebe nasaun ne’e infrenta.
Superintendente Newbrun haktui tan katak wainhira hare numeru violensia bazeia ba jender ne’e tinan-tinan aumenta ba bebeik, violensia kontra feto ne’e hahalok krimi ida, e presiza mos respeita feto sira nia direitu, tanba agora dadaun ne’e Estadu Timor-Leste retifika tiha ona Konvensaun ba Eliminasaun Diskrimasaun Hotu hasoru Feto (CEDAW).
