Grupu Feto ohin loron fiar katak liu hosi inisiativas diak ne’ebe implementa iha baze hahu ona hatudu rezultadu impaktu pozitivu ba Feto Timoroan tanba iha grupo feto barak iha baze ne’ebe komprende diak liu kona ba igualidade jeneru katak feto servisu saida deit ne’ebe mane servisu.
“Tuir uluk istoria beala sira nian katak feto tenke iha dapur deit labele sai ba liur so mane deit mak bele sai ba liur halo to’os ho natar hodi fo haan feen ho oan maibe agora ne’e iha mudansa tanba Timor-Leste iha ona lei ne’ebe aprova ona katak igualidade jeneru katak igualidade feto ho mane ne’e hanesan ne’ebe to’os uma hun feto mos bele halo laos mane deit,” dehan reprezentante Grupo Feto Estrela, Dalia Lemos Sarmentu, foin lalais (27/10), durante tuir treinamentu kona ba ‘To’os Uma Hun’ ne’ebe organiza husi Fundasaun Hiam Health, iha Comoro, Dili.
Tuir partisipantes balun hosi Grupu Feto iha Distritu Bobonaro, subdistritu Maliana, ohin loron iha feto barak iha komunidade ne’eba mak servisu ajuda mane sira iha to’os no natar ne’ebe luan hanesan kuda hare, hamos du’ut, koa hare laos to’os uma hun deit.
Durante formasaun ne’e Grupos Feto lori naran feto hotu iha areas rural rekomenda ba Fundasaun Hiam Healt atu kontinua fo nafatin treinamentu ba grupo feto sira iha distritu hotu ho tema ne’ebe diferente maibe relevante ba grupo feto tanba iha treinamentu ne’ebe sira seidauk hetan alende Kustura, Agrikultura, Saúde.
Iha lidun seluk Kordenadora Grupo Feto Terus Buka Naroman hosi Maliana, Marciana Goaveia Leite, hateten katak feto barak nia hanoin la hanesan feto seluk maske iha ona lei katak feto mos bele halo servisu ne’ebe mane halo hanesan to’os, natar maibe tuir ema ida idak nia konsensia.
“Ita feto mos bele halo to’os uma hun la presiza mane, duke ita iha uma tur konta istoria deit nusa ita la bele kria rasik aktividade ne’ebe ita bele halo hanesan mane sira,” dehan Kordenadora Leite.
