Bazeia ba esperensia ne’ebé mak Timor-Leste mós infrenta iha tempu pasadu durante okupasaun Indonesia nia ukun ho Ditadura Militar, Aktivista ba Justisa, Patrisia Isasa vizita mai Timor promove oinsa bele hakotu korenti impunidade ne’ebé buras iha rai laran.
“Hau mai iha Timor-Leste iha fulan ida nia laran, atu fahe hau nia esperensia no hau nia hanoin konaba luta kontra Ditadura Militar iha Arjentina iha tempu ne’eba to hetan duni Justisa, hodi hatama autor ne’ebé halo violensia kontra hau nia povu Arjentina ba Tribunal to tama ba komarka. Ho nune’e mai ita hamutuk hodi luta ba hakotu korenti impunidade iha rai ida ne’e,” hateten Aktivista Patricia Isasa durante seremonia enkontru Publiku ho nia topiku Jeral “Haluha Krime Pasadu, Hamate Justica Iha Agora no Futuru” iha STP-CAVR Balide, Dili, foin lalais (28/10).
Aktivista Justisa Isasa koko atu fo inspirasaun ba ativista sira iha Timor-Leste hodi kontinua luta ba hakotu impunidade ne’ebé nakonu ho dezafiu, no sei liu husi dalan ne’ebé naruk, hodi tulun vitima sira dirije sira terus no trauma ba kampania ne’ebé konstrutivu, inklui mós hodi influénsia Timoroan no Nasoins Unidas nia ema sira ne’ebé foti desizaun hodi promove Lei, Orden no Justisa.
Nia mos fiar katak wainhira nune akontese sei la iha tan ona impunidade no autor kriminozu sira ba krime sira hasoru umanidade nian hetan ona responsabilidade liu husi Tribunal Internacional ida ho kastigu ka sansaun ba sira ne’ebé jstu. Nune katak vitima sira krime hasoru umanidade nian sei moris ho satisfasaun ho justisa ne’ebé sira hetan.
Iha parte hanesan Peskizador Lao Hamutuk, Ines Martins N. Soares hateten katak vizita Aktivista Patrisia Isasa atu fo inspirasaun ba povu Timor atu nafatin kontinua luta ba Justisa.
“Ita presiza komitmentu ida, sekuandu ita abandona klaru katak ita nia luta ne’e sei lakon. Timor-Leste atu luta hasoru Justisa ne’e hanesan parede ida ne’ebé bo’ot. Indonesia hanesan ita nia nasaun vizinhu alen de ne’e mós ita nia indepedensia, maske ita ukun an ona entermus iha orgaun soberanu sira, maibé realidade entermus ita sidauk bele hala’o Justisa ne’e ho diak,” tenik Peskizador Soares.
Nia haktuir katak hanesan kazu 2009 Matermos Bere mai iha Timor nia tama iha prosesu zulgamentu para hatama nia iha kadeia, maibé Ministro Estranzeirus husi Indonesia rasik telefone ba Prezidente da Republika, iha mumentu ne’e hateten katak sekuandu imi la husik livre Matermos Bere ami sei la partisipa festa Indepedencia Timor nian. Ida ne’e nia hatutan tan signifika katak Timor-Leste presiza luta ba Justisa.
“Hau hare povu barak mak sei tanis buka sira nia Justisa, nusa mak ita labele hatudu netik responsabilidade ba povu hodi koalia konaba justisa.”
