Hare ba kondisaun Eskola Pre-Secundaria 04 Fatu-Meta, iha Dili, ne’ebé laiha moru no animal pasiar tun sa’e eskola oin no soe foer arbiru deit iha eskola bele lori moras ba estudantes sira.
Director Eskola, Domingos Obe, hateten katak governu liu husi Ministeiru Edukasaun (ME) presiza fo atensaun ba kondisaun eskola nian, tanba kondisaun eskola sai difikuldade bo’ot ba mestra/e sira inklui mós estudante sira wainhira hala’o ezame.
“Hau senti tristi iha ezame nia laran, ita hare kondisaun eskola la fo benefisiu ba estudante sira, animal tama sai eskola no soe foer arbiru deit, ida ne’e bele fo moras ba hau nia estudante sira. Moru laiha, kadeira no meza mós salaun balun laiha, hau nia estudante sira terus liu, maibé la fo impaktu ba prosesu izame nian,” hateten Director Obe foin lalais (27/10) iha nia eskola.
Nia hateten difikuldade ne’ebé mak eskola ne’e infrenta laos foin mak sira foti kestaun, difikuldade sira ne’e sira hato’o ona ba ME maibé laiha ninia rezultadu ne’ebé diak, tan ne’e sira husu atu ME lalika taka matan ba sira nia problema.
Diretor Obe reforsa liu tan katak kada semana-semana sira sempre hala’o limpeza jeral iha eskola, segunda tama eskola, kondisaun hanesan bain-bain foer mak nakonu no dala ruma alunus sira mós baruk hala’o limpeza, tanba la fo benefisiu ba sira.
“Ami hala’o limpeza semana-semana mós hanesan deit, foer iha nafatin, animal tama sai no soe foer arbiru deit, halo alunus sira mós baruk atu halimar iha zardin laran. Iha tempu udan hanesan ne’e alunus sira sulan deit iha salaun laran, sira lakoi halimar iha jardin tamba foer,” tenik nia.
Iha parte hanesan, Suzana Moniz nudar estudante hateten, hare ba kondisaun eskola sira senti tristi tanba nakonu ho foer, maibé atu halo nusa sekuandu governu la fo ona atensaun ba ira nia eskola, hanesan labarik sira senti la dun kontenti ho kondisaun ida ne’e.
“Ami senti tristi oituan, hanesan labarik ami labele halimar iha jardin laran, tur halimar, konta historia halimar, hanesan maluk sira seluk. Ami nia eskola ne’e foer mak nakonu, ami hala’o limpeza semana-semana, maibe foer nafatin. Sexta hamos segunda tama eskola foer fali, tanba laiha moru,” tenik Suzana.
