Hare ba kondisaun eskola Pre-Secundaria no Secundaria 10 Dezembro, iha Dili, ne’ebé la fo benefisiu ba estudante sira atu hala’o ezame nacional, Governu liu husi Ministeiru Edukasaun (ME) hamutuk ho Ministerio Infrastrutura hodi hala’o rehabilitasaun ba eskolas ne’e.
“Hare ba kondisaun eskola ne’ebé mak la fo benefisiu ba estudante sira, governu komesa hala’o ona rehabilitasaun ba eskola ne’ebé refere, atu nune’e wainhira eskola ne’e kontinua fila fali ninia aktividade eskola nian, labele sai tan difikuldade bo’ot ba estudante sira,” hateten Director Eskola Pre-Secundaria 10 Dezembro, Debas Kanisues S. foin lalais (27/10).
Director Kanisues S. hateten tan katak governu komesa tau matan ona ba difikuldade ne’ebé mak durante ne’e estudante sira infrenta no katak estudante sira hala’o izame Nacional lao ho diak, maske hetan difikuldade bar-barak, liu-liu ba sala aulas.
Nia hatutan, edukasaun fizika ida ba estudante sira bele dehan katak terus oituan, liu husi edukasaun parte ida sei terus mak bele hetan susesu, laos lao ho diak hela deit ida ne’e lalos, maibé governu mós tenki fo atensaun makas ba asuntu edukasaun, e laos fo atensaun deit ba Eskola 10 Dezembro, fo mós atensaun ba eskola sira seluk ne’ebe presiza mos governu nia tulun.
“Koalia konaba asuntu edukasaun, hau hanoin ida ne’e asuntu importante ida ba ita hotu, liu husi edukasaun bele eduka ema sai matenek, liu-liu eduka foin sa’e sira atu nune’e iha loron ikus sira bele troka nai ulun sira hodi ukun nasaun ne’e,” katak Diretor Kanisues S.
Director ne’e mós hateten katak, Eskola 10 Dezembro laos hetan difikuldade deit konaba sala, maibe hetan mós difikuldade konaba livru. Tuir nia atu sai matenek laos sai husi kakutak deit maibé presiza mós le’e livru barak, hodi sai referensia ida ba mestre/a sira atu halo planu ba mestre/a sira hanorin.
Maibé tuir nia, livru ne’ebé mak nia husu azuda ba Ministeiru Edukasaun sidauk simu ninia rezultadu, ida ne’e sai mós perkupasaun ba mestre/a inklui mós alunus sira, maske hetan difikuldade oin-oin importante mak ezame nacional bele realiza ho diak.
Iha parte hanesan, Salvador da Cruz nudar estudante hosi Eskola Secundaria 10 Dezembro hateten nia parte senti tristi oituan wainhira hala’o ezame ia lona okos, maibé ezame ne’e lao ho susesu, tan ne’e nia husu ba governu liu husi Ministeiru ME atu fo atensaun liu ba estudante sira nia difikuldade, laos iha nia eskola deit, importante iha eskola hotu-hotu.
“Hau senti kontenti ona Ministeiru Edukasaun komesa hala’o ona rehabilitasaun ba ami nia eskola, hau espera katak tinan oin mai estudante sira labele hetan bebeik difikuldade ne’ebé mak estudante agora hetan,” nia reforsa.
