Realidade iha rai laran hatudu katak Ministerio Edukasaun seidauk bele rezolve problemas ne’ebe eskola publiku sira infrenta iha teritorio tomak hanesan Eskola Publiku Ensinu Baziku 01 Asumau, iha subdistritu REmexio, Distritu Aileu tanba orsamentu la sufisiente atu rezolve problems eskolas hotu iha rai laran dala ida.
“Ami iha eskola fatin preokupa liu mak serkus atu haleu iha eskola tanba labarik sira halimar iha area eskola sempre halai mai iha estrada, atu prevene labarik sira husi asidente. Meza kadeira mos ami presiza no livrus mak ami presiza liu hanesan livru Estudu do Meiu, Matematika no Artes Kultura tanba Artes Kultura ne’e la kompletu,” dehan Professor da Turma, Fernando da Costa, (26/10) iha Remexio, Distritu Aileu.
Eskola publiku ne’e iha aula hitu no estudantes hamutuk nain 346 no prosesu aprendizajen hahu iha loron segunda feira to’o sabadu no lao normal maske falta livrus.
Iha Eskola Publika ne’e programa Merenda Eskolar sei lao kontinua to’o agora.
Alende Eskola Publiku Ensinu Baziku 01 Asumau, iha mos Eskola Publiku filial Buburnaru no Eskola Infantil Buburnaru ne’ebe nia prosesu aprendijajen sei kontinua ho estudantes tur iha rai tanba falta meja no kadeira.
“Ami nia alunus sira sei tur iha rai bainhira halao prosesu aprendijajen no dificuldade ne’ebe ami infrenta mak bee moos tanba estudantes sira kuru rasik bee hodi tein merenda eskolar maibe bee ne’e iis. No falta livrus atu hanorin,” dehan Professor João dos Santos.
Professor dos Santos hatutan katak Eskola Publiku filial Buburnaru iha alunus nain 75 ne’ebe uza aula rua no alunus Eskola Infantil nain 51 no professor nain rua deit.
Iha parte seluk estudante João De Andrade hateten katak problemas ne’ebe sira infrenta iha eskola ne’e ida mak rezolve ona hanesan problemas bee moos tanba bee moos inportante tebes ba estudantes sira atu bele aprende moris iha moos nia laran.
“Ami sente kontente tebes tanba bee moos inportante tebes ba ami estudantes atu bele uza hodi tein iha eskola hodi bele garantia ami nia saude.”
Iha oportunidade ne’e mos professores no alunus sira hato’o sira nia agradesementu ba UNICEF no Uniao Europa ne’ebe oferese ona projeitu bee moos iha sira nia eskola no sira promete sei uza bee ne’e ho diak.
