“Hau konsidera Justisa ne’e só ba ema kiik deit, maibé ba ema bo’ot la vale, realidade maka agora akontese ba ami ne’e,” Salsinha hateten ba Media iha Gleno, Ermera, foin lalais.
Tuir Organizasaun Naun Governamental Programa Monitorizasaun ba Sistema Judisial (JSMP) no Asosiasaun Direitus Humanus (Yayasan HAK) nia hare katak diak liu Salsinha ho nia grupu lalika hakilar ba Justisa no direitu no diak liu ba deskansa ona tanba povu mós sei la fiar tan justisa ne’ebé mak Salsinha hakilar.
Tuir JSMP sira tenki trata tuir linha administrativu nian, tanba akordu ne’e eskrita ka lae, ne’ebé antes ne’e entre grupu petisionariu ho estadu konkorda halo ida ne’e, nia impedementu ne’e iha ne’ebé, razaun tanba saida mak iha tiha konkordansia depois de la implementa, buat hirak ne’e hotu taka ona.
“Hau hanoin inkoraja sira atu buka dalan oinsa maka bele kordena ho ministeiru relevante ne’ebé mak toma responsabilidade ba ida ne’e,” tenik Director JSMP Luis de Oliveira Sampaio foin lalais (28/10).
Durante ne’e JSMP eziji ba Salsinha ho Grupo eis petisionarius atu koalia kolabora ho prosesu judicial maibe iha tribunal sira la koalia no dependente deit ba pozisaun Prezidente Jose Ramos Horta atu indultu sira.
“Ida ne’e konsikuensia ba sira. Iha mumentu ne’eba sira atu taka lia los, sekuandu ita taka lia los bo’ot sira halo Justisa konformi sira nia hakarak. Ida ne’e depende ona bo’ot sira. Prinsipiu Justisa ita nunka hare ba poder politiku, prinsipiu Justisa ne’e tenki hatur lolos iha lia los nia leten,” hateten mos Director de Oliveira relasiona ho ezijensia por vos Salsinha nian.
Entretantu Prezidente da Republika, Jose Ramos Horta, mos hateten katak Salsinha lalika halimar ho ahi no lalika koalia demais, diak liu esforsu aan buka hadia nia vida hodi hare familia, tanba nia duni maka dada petisionariu lubuk ida sai terus.
Prezidente Horta hateten tan katak uluk nia duni mak halo apelu ba Salsinha ho elementus sira atu rona, maibé ikus sira la rona no tama prizaun depois Prezidente ho laran luak fo indultu ba sira.
“Ninia estatutu nudar eis kriminozu Becora, kuandu ita komete krimi bo’ot ida kontra Estadu, ne’e ita lakon buat hotu-hotu. Iha rai balun nia lakon ona sidadaun atu votu tanba krimi bo’ot ne’ebé nia komete,” tenik Prezidente Horta.
Prezidente haktuir tan katak Salsinha ho nia elementus laos simu Amnestia, kuandu Amnestia, entaun sala sira ne’e hamoos hotu.
“Salsinha hetan julgamentu iha Tribunal. Tribunal kondena nia hodi tama iha prizaun. Prezidente ho laran luak fo Perdaun, maibé ne’e laos Amnestia, ne’e duni, husu ba Salsinha atu nonok no labele koalia konaba nia direitu,” Prezidente Ramos-Horta haktuir.
Prezidente Ramos-Horta mos lamenta tanba maske nia fo Perdaun ba Salsinha no nia elementua atu bele said hosi Prizaun Becora, maibé sira nein haruka surat agradesementu ba nia, aat liu tan halo nafatin ezijensia.
