“Kuandu koalia ona Povu Kuda Governu Sosa, primeiru Governu tenki hanoin uluk hadia dalan,” hateten Deputadu de Araujo, iha Parlamentu Nasional, Dili, foin lalais (28/10).
Deputadu de Araujo hatutan katak wainhira la hadia uluk mak dalan, nia inpaktu mak komunidade sira labele lori sira nia produtu lokal ba to’o iha merkadu ka iha Dili atu faan.
“Politika Governu nian mak, Povu Kuda Governu Sosa maibe buat sira ne’e sai lambing deit, hanesan rade lian lian maibe realidade iha nebe,” Deputadu ne’e husu.
Nia kestiona mos sekarik Governu sosa ona produtu lokal, entaun nia distribuisaun to’o ona iha ne’ebe. “Pur ezemplu ita hare deit ba Turiskai, Maubise no hare ba Fatubeliku, repoliu sira nia ta’a lori mai tau iha saku-saku hodi mai iha Merkadu Hali-Laran, Merkadu Komoro no Merkadu Taibesi. Antes sira lori mai iha merkadu sasan sira sai dodok tiha deit,” Deputadu de Araujo haktuir.
“Estrada tenki to’o iha povu ninian to’os iha dalan ninin, entau povu kueleta ona nia sasan husi to’os mai, tau kedas ba kareta, kareta lori mai iha Dili iha Supermarket sira para nia kondisaun bele diak.”
Tuir nia katak “ne’e duni hau konsidera Ministeriu MTCI, hanesan loko aan, gaba aan maibe servisu iha terenu hau bele dehan 25 pursentu deit, la to’o iha 50 pursentu.”
Entertantu Deputadu Joaquin dos Santos hateten liafuan ne’e kortina metan para tenik publiku nia matan katak Governu halo buat diak ba Povu maibe fila fali ba layar metan korupsaun mak barak.
“Ne’ebe ita hakilar bebeik Povu Kuda; povu loro-loron kuda hela, batar, hare, fore, kuda feuk, kuda aifarina, kuda buat hotu hotu ho sira nia kosarben rasik maibe Governu sosa iha nebe,” hateten Deputado dos Santos.
Nia hatutan tan katak, Ministeriu Agrikultura fo osan bara-barak no halo projetu pilotu bara-barak maibe la iha rezultadu diak.
“Ministeriu infrastrutura deit la hadia estrada para povu bele transporta nia sasan mai merkadu deit mos la iha. Povu atu mai fa’an oinsa?”
Nia esplika tan katak governu liu husi MTCI dehan atu sosa produtu lokal maibe armazen deit atu rai produtu lokal la iha.
“Ita lalika bosok deit povu, hari plaka bobot gasta osan bara barak tau iha kruzamentu no fatin hotu-hotu, dehan Povu Kuda Governu Sosa, sosa saida?”
TDW koko konfirma asuntu ne’e ba iha MTIC maibe la iha reprezentante ida pronto atu fo komentariu ba media.
