Tuir eis Vise primeiru Ministru no atual Membru Parlamemtu Nasional Deputadu Mario Viegas Carascalao hateten implementasaun Orsamentu Jeral du Estadu (OJE) 2011 iha failansu tanba planementu mak la diak.
“Ita hatene katak, prosesu nebe atu fahe projetu sira ne’e mos kon kali kon barak, fahe ba malu deit,” dehan Deputadu Carascalao, PSD, iha Parlamentu Nasional, Dili, semana kotuk (24/10).
Deputado Carascalao hateten katak implementasaun projetu lao la diak tanba fahe deit ba maluk sira nebe la iha kapasidade no tanba ne’e mak implementasaun la lao ho diak ikus fali.
Nia haktuir katak tuir los projetus ba 2012 labele bot liu fali 2011 ninian tanba implementasaun projetu 2011 nian sidauk remata.
“Se ita hakarak aumenta tenki iha justifikasaun ke diak, tenki mos aumenta kapasidade implentasaun nian.”
Entertantu Deputadu Aderito Hugo, CNRT, hateten katak implementasaun OJE 2011 to’o iha fulan 28 Fevereiru mak foin remata.
“Katak ita sei bele iha ezekusaun dujentus milhoens ital do orsamentu korente atu ezukuta ne’e, to’o iha dejembru ita bele hare estatistika bot,” dehan Deputado Hugo.
Nia dehan tan katak se ita kaer tomak $1.700 bilhaun ita la konsege separa fundu infrastrutura karakter Multi Year ,entau ezekusaun kik koan. “Mas ita hare orsamentu korentes ne’e 74 pursentu bot.”
Nia haktuir tan katak estatistika ezekusaun OJE 2011 husi primeiru to terseiru Trimestre sidauk bok.
“Barak liu bai bain ezekusaun masimu ne’e mak iha sigundu trimester no kuatru trimester ninian, katak terseiru trimester iha meadu ninian, kuartu Trimestre to’o iha 30 de Dejembru, tuir lei sistema orsamentu ninian vigor iha rai laran,” dehan tan Deputadu Hugo.
Nia fo hanoin katak tuir relatoriu nebe mak Ministeriu Finansas hato’o ba Parlamentu Nasional katak ezekusaun OJE 2011 atinji ona 64 pursentu.
“64 pursentu cash katak, osan nebe selu ona, sira nebe sidauk selu iha obrigasoens katak, kontratu halo ona maibe sidauk selu. Balun kompania tender tiha ona maibe halo hela.”
Deputado Hugo fo hanoin dala ida tan katak ezekusaun OJE 2011 sei remata iha 28 Fevereiru 2012.
