Sosiedade Sivil liu husi Farming Study Group, hanesan mos membru kor Group Transparency, husu ba orgaun kompetente atu halo investigasaun ba osan 400 mil ne’ebe Membru Parlamentu hato’o iha Parlamentu Nasional, tanba parlamentu la temi ema ida nia naran tanba sa mak ema balun rejeita makas ba asuntu ne’e.
“Ema balun fo hanoin ba publiku katak, tanba sira rejeita, rejeita tanba saida. La hatudu ema nia naran iha Parlamentu neba maibe ema balun hatudu aan sira rejeita,” hateten Remigio Laka, Diretor Farming Study Group iha Salaun Canossa Has Laran, Delta Comoro, semana kotuk (15/10).
Diretor Laka hateten tenki halo investigasaun tuir osan ne’e tanba osan ne’e laos ema ida ka rua nian maibe publiku nia problema.
“Tenki hatene ema nebe lori osan ne’e, laos dehan deit rejeita iha publiku, seidauk hatudu evidensia katak se mak foti,” hateten tan Diretor Laka.
Nia informa mos katak Komisaun Anti Korupsaun tenki halo investigasaun profundu ba problema ne’e.
Iha parte seluk Diretor Laka mos hato’o husu ba Parlamentu Nasional atu aprova lalais Lei Money Laundry atu nune’e bele kontrola osan sai no tama.
“Ami husu ba Parlamentu Nasional iha tempu badak nia laran aprova lalais Lei Money Laundry atu nune’e bele kontrola ema nebe lori sai osan no lori tama osan it abele hatene tuir.”
Entertantu tuir Deputadu Inacio Morera, FRETILIN, katak Deputadu Paulo Martins iha parlamentu foin dadauk halo nia deklarasaun ba Interse Nasional, hanesan deputadu hakarak ka la kohi tenki koalia.
“Sr. Deputadu koalia mos la temi ema ida nia naran, tanba sa mak agora ida-idak mai ninia konferensia da imprensa hateten an dehan “ami la halo buat ida” hateten Deputadu Moreira.
Atu la bele sai polemika liu Deputadu Moreira husu halo investigasaun klean deit ona.
“Halo investigasaun klean no formal. Estadu Australia ho Estadu Timor-Leste tenki anunsia para buat ne’e hela klaru.”
Alende ne’e Deputadu Manuel Tilman, KOTA, hateten Lei Money Laundry tama ona iha espesialidade no diskuti tiha ona Artigus hamutuk 15.
“Agora tanba Orsamentu [Jeal Estadu 2012] mak ami seidauk diskuti tan, maibe ami sei hahu fila fali debate iha Parlamentu depois dia sinco de Dezembru.”
Deputadu Tilman hateten katak osan nebe mak mosu iha Australia ne’e buatus deit. “So ke Timor ne’e blok ne’e, hotu–hotu koalia maibe Polisia Australia mos dehan katak osan la mosu ida,” haktuir Deputado Tilman.
Nia esplika katak, lei Money Loundry ne’e wainhira paralamentu aprova ,lei ne’e sei regula ba Interese Timor ninian.
