Relasiona ho kestaun Muru Protesaun iha Maubara ne’ebe monu hafoin mak halo fulan rua depois de harii, Sekretariu Estadu Obras Publikas, Domingos Caero, iha Parlamentu Nasional, Dili, semana kotuk, hateten katak muru protesaun Maubara Ministeriu rekruta halo outsourcing ba konsultan Internasional ida fo fiar ba nia nian atu halo monitorijasaun ba projetu ne’e.
“Kaju ne’e rasik hau hare no rona, deklarasaun iha plenaria ne’e, husu kedas ba Sr.Diretor para tun iha fatin para atu hare asuntu ida ne’e para husu ba konsultan atu tau atensaun ba ida ne’e,” hateten SE Caero.
Diretor Estradas, Sr. Nilton, iha Sekretaria Estadu Obras Publikas, hateten katak los duni hafoin nia ba haree muru protesaun monu duni. Nia hateten tan katak nia bolu tiha ona atensaun ba kontrator atu justifika situasaun ida ne’e.
“Ami mos bolu ona konsultan no mos kontraktor nebe mos halao [servisu]. Iha semana liu ba ami bolu sira para atu rezolve fali saida mak akontese iha neba sekarik buat nebe aat oinsa atu rejolve no responsabiliza,” hateten Diretor Estragas, Sr. Nilton.
Maibe iha nia parte Deputadu Inacio Moreira, FRETILIN, la aseita ho situasaun muru iha Maubara, Distritu Liquica, bele monu tanba foin mak harii la liu fulan rua monu tiha ona no mos la simu kompanhia halo servisu la diak depois hetan oportunidade hadia deit.
“Los duni ita bot sira dehan, ne’e responsabilidade kompania ninian, so ke hau la konkorda buat ida halo tiha aat fila fali halo fali deit,” hateten Deputadu Moreira iha Parlamentu Nasional, semana kotuk (13/10).
Tuir Deputadu kestaun fundamental la os muru monu maibe tanba saida mak monu.
“Favor ida ita bot sira bele hato’o tok esplikasaun ruma,” hateten Deputado Moreira.
