Sekretariu Estadu Obras Publikas, Domingos Caero, hateten katak proseu reabilitasaun ba Ponte Loes iha Distritu Liquica, horas ne’e dadauk atinji ona 85 pursentu no sei remata iha fulan Novembru tinan ne’e.
“Progresu ne’e lao kleur oituan duni tanba sira persija mobilija ekipamentus nebe tuir espesifikasaun nebe sira aprejenta mai ami, mai husi Indonesia. Iha terenu sira nia tekniku ladun barak maibe ami dudu nafatin sira para udan monu rai sira tenki konklui ona Ponte ne’e,” hateten SE Caero Caero, iha Parlamentu Nasional, semana kotuk (13/10).
SE Caero hateten tuir deklarasaun nebe mak Obras Publika simu husi kompania nebe mak halo reabilitasaun ne’e katak, iha loron lima fulan Novembru reabilitasaun ba Ponte ne’e bele remata ona.
“Lolos ne’e ita bele autorija ona kareta bot sira bele liu iha leten, maibe tanba sira bok ona parte husi estrutura leten, entaun Diretor Estrada rasik husu ba Polisia nafatin manten para la bele autoriza kareta bo’ot ho tonelada bo’ot la bele liu,” haktuir SE.
Entertantu Prezidenti Komisaun G, Pedro Martires da Costa, hateten katak Ponte Loes tinan ne’e bele remata ona.
“Iha orsamentasaun 2011 ninian ne’e husi sekretariu Estadu Obras Publikas nian garante katak, fulan ida tan bele hotu ona.”
