Tuir Deputadu Francisco Branco, FRETILIN, horas ne’e dadauk partidu seidauk foti desizaun atu kandidata Taur Matan Ruak ba Prezidenti da Republika iha Eleisaun Prezidensial 2012 tanba lideransa partidu mak sei foti desizaun ne’e.
“Diak liu husu deit ba iha Lideransa partidu deit. Bankada la bele koalia,” hateten Deputadu Branco, iha Parlamentu Nasional, semana kotuk (19/10).
Entertantu membru bankada Partidu Sosial Demokratiku (PSD), Mario Viegas Carascalao, hateten katak nia partidu bele apoiu kandidatu Taur Matan Ruak iha Eleisaun 2012 tanba PSD la hare problema ruma ho kandidatu ne’e.
“Nia ema ida rezistensia, ema ida ke integridade aas, to’o ohin loron la iha problema ruma ke involve eis major Taur Matan Ruak,” hateten Deputadu Carrascalao.
Tuir nia katak PSD atu desidi ba desizaun ida ne’e tenki desidi iha konselu nasional mak foin bele fo liberdade ba nia militante atu hili ida nebe diak liu.
“Hau ema ida ke la iha difikuldade liu sekarik partidu iha kandidatu rasik no la iha kandidatu rasik. Hau tuir disiplina partidaria hau tenki hili duni kandidatu partidu nebe partidu hili ne’e,” hateten Deputadu Carrascalao.
Entertantu Xefi bankada ASDT, Domingos da Costa, hateten katak partidu ASDT seidauk desidi sira nia kandidatu mak se.
“Agora ami seidauk desidi tanba ami sei tur hamutuk mak foin desidi atu hili ida nebe –nebe,” hateten Deputadu da Costa.
Tuir nia katak, horas ne’e dadauk partidu ASDT seidauk fo apoiu ba ema ida.
“Ami iha ona hanoin maibe konforme kandidatu nebe mak ami sei hare.”
