Membru parlamentu Nasional hateten katak prejensa Organijasaun Nasoens Unidas (ONU) iha Timor-Leste pozitivu tanba Timor hetan independensia sira ajuda sira nia forsa estabilidade mai hodi ajuda Polisia Nasional, PNTL, no Forsa Defeza Nasional, F-FDTL.
“Agora diak ona, sira nia kontribuisaun mos bo’ot, agora tempu ona atu fila fali rai seluk, ka fila fali ba uma,” hateten Deputadu Mario Viegas Carascalao, PSD, iha Parlamentu Nasional, foin daudauk (24/10), iha okaziaun Loron ONU nian.
Deputadu Carrascalao hateten katak agora ita bele lao mesak ona, la persija prejensa ONU iha Timor.
“Failansu laos saida deit mas hare katak sira halao sira nia servisu lao deit ho sira nia kareta deit, sira simu osan bot, kria mos problema iha ita nia rai no kria mos inflasaun iha ita nia rai,” hateten Deputadu Carascalo.
Nia esplika tan katak kria inflasaun iha Timor-Leste tanba sira manan osan bot sira bele hola maibe ita nia povu la iha kapasidade atu sosa.
Entertantu Deputadu Domingos Mesquita hateten katak prezensa ONU nian iha Timor-Leste iha lamentasaun barak entermus politiku nian.
“Oinsa sira bele dezenvolve Timoroan sira nia kapasidade atu bele depois sira sai ita tama kaer rasik ita nia Admistrasaun no ita nia Siguransa no area seluk tan,” dehan Deputado Mesquita.
Nia hatutan katak Asesor sira nebe mak ONU sira tau la iha motivasaun ke diak para transfere sira nia matenek ba ita Timoroan sira.
“Dala ruma sira iha ministeriu, sira mak halao fila fali servisu iha Ministeriu, tuir lolos ita Timoroan sira mak halo. Dala ruma ita kapasidade la iha sira mak halo servisu fali hanesan Diretor ruma,” Deputado Mesquita dehan tan.
Deputado ne’e haktuir tan katak ida ne’e mak problema bot wainhira sira nia kontratu naruk, salariu bot halo tendesia la kohi transfere sira nia matenek ba Timoroan sira nebe mak dpendensia ba sira.
“Ida ne’e mak hau hare hanesan problema bot ida, sidauk transfere matenek ida ke diak asesor internasional sira ba Timoroan sira.”
Nia hateten tan katak koperasaun ONU ho Estadu Timor-Leste lao diak maske iha lamentasaun balun konaba relatoriu ONU nian iha tempo foin liu ba.
