“Ami nia uma mahon ne’ebe harii iha 2004 ne’ebe hetan suporta husi Caritas Australia rasik, no tuir dadus ne’ebe ami iha durante ne’e ami atende ona vitima violensia domestika nain 28 no [violensia] seksual nain 4. Ami atende sira liu husi fo kounseling depois akompania sira halo tratamentu medica iha ospital, akompania sira halo mediasaun tradisional no akompania sira halo julgamentu iha tribunal,” hateen Ramila Da Costa nudar Kordenadora programa Uma Mahon Enklabe Oe-cuse, iha Dare, Dili, semana kotuk (19/10).
Kordenadora da Costa, hatutan katak vitima violasaun seksual ne’ebe ho idade 14 no 15 seidauk hetan audiensia iha tribunal. Kazus konaba violensia domestika balun rezolve liu husi mediasaun tradisional katak fila fali ba familia no durante sira iha uma mahon sira hetan suporta osamentu husi Caritas Australia hodi ajuda sira nia moris hodi bele hein kazu ne’ebe sira hasoru.
Uma Mahon Enklave Oe-cusse iha regulamentu katak vitima sira iha direitu atu hela iha ne’e ba durante 72 horas ka loron tolu deit tanba uma mahon ne’e la os bo’ot atu fasilita sira hodi hein kazu hanesan ne’e to’o hotu.
Maske Nasaun Timor- Leste iha ona lei atu regula ema ne’ebe halo Violensia Domestika kazus Violensia Domestika kontinua aumenta. Lei kontra Violensia Domestika (Lei N.7/2010) Promulga hosi Prezident da Republika, Jose Ramos Horta, iha loron 21 fulan Juhu tinan 2010.
Kordenadora da Costa hatutan tan katak organizasaun Forum Peduli Wanita Oecuse (FPWO) durante ne’e fo ona kapasitasaun ba gruopu feto maluk sira tanba tuir FPWO katak liu husi trinamentu nee’be sira fo bele involve feto hodi kapasita sira nia nia koinesementu atu bele involve aan iha vida politika no bele hamenus Violasaun Seksual no Violensia Domestika.
“Ami mos konsege halo treinamentu ba kandidata feto iha suku atu bainhira sai xefe suku sira bele inplementa planu ne’ebe diak iha suku laran maske iha distritu Oeusse la konsege feto involve iha suku maibe iha feto maluk barak mak kandidata aan iha elisaun xefe suku.”
Organizasaun FPWO harii iha 22 Fevereiru 2002 ho misaun katak bele hamenus violasaun seksual no violensia domestika iha enklave O-cusse liu hosi harii uma mahon ida ne’ebe servisu konaba direitus umanu, sosializasaun no treinamentu ba feto sira ho programa oioin. Program ne’e halao laos ba feto deit maibe ba joventude feto no mane sira hotu atu kapasita sira nia aan hodi bele buka servisu.
