“Halo lansamentu ida ne’e, tanba ema iha preokupasaun barak, koalia dehan kareta halai barak, gasta mina barak, osan ba hadia kareta barak ema diskonfia katak dala ruma atu halo servisu ruma dehan mina la iha,” hateten Jose Antonio de Jesus da Neves, Komisariu Adjuntu Edukasaun, Kampanha no Peskiza, durante okaziaun lansamentu relatoriu iha Salao Delta Nova, Comoro, iha Dili, semana kotuk (20/10).
Tuir Komisariu Adjuntu Neves katak, objetivu Komisaun Anti korupsaun (CAC) halo Monitorizasaun ida ne’e tanba preokupasaun barak mai husi publiku, funsionariu sira no mos membru Governu sira.
“Komisaun halo ida ne’e tanba ninia knar ida halo prevensaun, atu prevene buat sira ne’e para la bele mosu tan.”
Komisariu Adjuntu Neves hateten iha diskonfia balun tanba utiliza sasan estadu nian hodi halao interese privadu nian ne’e kategoria ida tama iha klassifikasaun Korrupsaun.
“Ida ne’e iha dalan seluk, maibe ida ne’e bolu atensaun deit katak tenki hadia buat ruma para movimentu kareta tenki orienta barak liu ba servisu estadu ninian,” nia haktuir.
Rezultadu iha relatorio CAC hatudu katak peskiza monitorizasaun ba Veiklu Estadu hatudu 35,057, 67 pursentu movimentu iha loron servisu 33 pursentu movimentu iha Sabadu no Domingo. Movimentu kareta mos iha kategoria rua: ida iha sidade Dili laran, ida seluk tama no sai iha sidade Dili laran iha loron Sabadu no Domingo.
Entertantu funsionariu Ministeriu Estatal, ho inisial DC, hato’o nia sujesatun ba iha Komisariu CAC Neves katak movimentasaun kareta estadu ba iha distritu barak tebe-tebes.
“Hau hakarak sujere deit, se bele karik atu halo monitorizasaun ba sira nebe sai ba liur, tanba husi lafatik Komoro ba to’o iha F-FDTL, iha funsionariu barak iha hela neba, I sira uza kareta estadu nian,” hateten funsionario DC.
