Organizasaun Naun Govermental (ONG) CAUCUS ne’ebe durante ne’e servisu iha area politika kontinua suporta no fo enkoraja ba feto politka sira atu involve aan iha vida politika iha 2012 liu husi treinamentu ho tema “Haforsa Feto Nia Lideransa iha Partidus Politikus, liu husi formasaun lideransa transforma,” tanba atu sai lideransa ida tenke iha koinesementu masimu.
“Ami nia treinamentu ne’e halai liu ba iha lideransa transformativa ne’ebe inportante tebes ba feto politika sira ne’ebe atu sai lider tenke komprende tanba iha lideransa transformativa iha modul barak. Primeiru modul ne’e mak oinsa bele koinhese ita nia aan, molok atu sai lideransa ida tenke koinhese aan ho ita nia forsa no frakeza ne’ebe iha para hadia farakeza ne’ebe iha no aumenta forsa, ne’eduni treinamentu ne’e inportante tebes,” hateten Directora CAUCUS feto iha politika, Juleta Ferreira da Silva, semana kotuk (14/10) iha Aula CNE, iha Kaikoli, Dili.
Diretora da Silva hatutan tan katak objetivu husi treinamentu ne’e hanesan atu fo formasaun no koinhesementu ba feto potensial iha partidu politiku bainhira sira sai lideransa no reprezenta feto no povu Timor iha Parlamentu Nasional no atu halo transformasaun bainhira sai lideransa ida parte seluk prepara politika ida ne’ebe diak atu halo mudansa liu-liu ba feto nia moris no hasai feto husi violensia no deskriminasaun.
Treinamentu ne’e hetan ajudus fundu husi sosiedade sivil Gabinete Primeiru Ministru ho montante 10 mil resin.
Entertantu feto potensial politika Partidu Social Demokrata, Maria Lourdes de Sousa Ximenes, hateten katak nudar ema ne’ebe foin atu aprende involve aan iha vida politika presiza duni tulun husi CAUCUS liu husi treinamentu ne’be iha bele hatene diak liu tan konaba lideransa transformative.
“Hau hanoin treinamentu ne’e util teb-tebes atu bele dezenvolve no kapasita feto sira liu-liu hau nia aan rasik bele hetan koineshementu ne’ebe diak husi Caucus nune’e aban bairua se karik ita ba iha lapangan ita preparado ona,” hateten Feto Potensial PSD Ximenes.
Nia haktuir mos katak sira sei fahe informasaun no koineshementu, kapasidade ne’ebe sira hetan iha treinamentu ne’e ba feto maluk sira ne’ebe iha PSD atu nune’e bele fo benefisiu ba partido social demokrata no Nasaun Timor-Leste.
