Lider la os mossu deit ka buat fasil ida atu aprende no dezenvolve no nune mak agora dadaun feto politika sira husi partidus politikus 22 ne’ebe regista ona ho Komisaun Nasional ba Eleisoens (CNE) no buka aprende no dezenvolve kapasiade no koinesementu rasik liu husi treinamentu ne’ebe organiza husi Organizasaun Naun Govermental (ONG) Caucus durante workshop ida ho nia tema “Haforsa Feto Nia Lideransa iha Partidus Politikus liu husi formasaun lideransa transformativa”.
“Hau hanoin buat barak mak ami aprende ona iha treinamentu ida ne’e liu-liu konaba lideransa nian oinsa atu sai lideransa ne’ebe diak. No tenke muda hahalok ne’ebe ladiak bainhira atu sai lideransa ida diak,” hateten feto politika Partido Demokrata, Yuli Kurniasih, iha semana kotuk (14/10) iha Aula CNE, Kaikoli, Dili.
Feto Politika Kurniasih hatutan katak trernamentu ne’e importante tebes ba feto ne’ebe involve iha vida politika tanba liu husi treinamentu ne’e bele hasae kapasidade no koinesementu ne’ebe diak bainhira sai lideransa ida ne’ebe diak maske nia senti treinamentu ne’e seidauk to’o no presiza aprende barak liu tan.
Maibe nia lori naran Partidu PD iha oportunidade hato’o agradese bo’ot ba CAUCUS ne’ebe fo ona tempu atu fo treinamentu ba feto politika sira hotu iha partidus politikus sira.
Entertantu Filomena de Oliveira Camões,feto politika Partidu CNRT, hateten katak material ne’ebe sira hetan husi trinamentu ne’e material ne’ebe baziku teb-tebes tanba halai liu ba iha pisikologia lideransa ida-idak nian, maibe importante tebes ba politika nain sira liu-liu feto atu bele konhese sira nia aan ho diak hodi bele defende povu liu–liu feto no labarik iha areas oi-oin iha uma fukun Parlamentu Nasional.
“Hafoin hetan treinamentu ne’e hau bele hatudu atitude ne’ebe mak diak ba hau nia partidu nune’e hau bele sai hanesan ezemplo ida diak ba feto maluk sira no partidu ka nasaun Timor-Leste,” hateten Feto Politika Camões.
