Assosiasaun Jornalistas Timor-Leste (AJTL) halao Congresso ba dala rua foin daudauk (15-16/10) iha Salao Canossa, Has Laran Delta, Comoro, Dili, ho objektivu principal soru mutu jurnalistas ne’e atu konsolida AJTL atu iha planu no mos programa aksaun no mos atu reve fali Kodigu Konduta ba Jurnalistas sira.
Maske ohin loron iha Timor-Leste iha organizasaun media barak ona maibe kualidade informasaun jurnalistas Timoroan fo sai ba publiku sei hetan kestiona barak kona ba informasaun tamba jornalista la dun hetan kapasitasaun no espasu atu halo reflesaun ba sira nia servisu no mos resposablidade bainhira halo notisia.
“Ami hanoin Jornalista nia servisu la os hakerek deit maibe nia tenki hakerek ho intensaun atu muda ema ruma nia atitude, atu transfere buat ruma hodi nune’e media bele sai hanesan transformasi ba social mos hamutuk ho komponente sosiedade nian,” hateten Prezidente AJTL ba termu anterior, Virgilio Guterres, durante congresso ne’e.
Tuir nia katak bainhira konsolida AJTL, “então ita bele iha planu, programa atu oinsa hare ba membru asosiasaun ninia nivel profesionalismo ne’e to’o iha ne’ebe, ninia kapasidade atu hakruk ba kodigo de konduta jornalismo ninian ne’e oinsa.”
Guterres mos husu ba Jornalista sira atu kumpri mos artigu 5 iha Kodigu Etika AJTL ne’ebe hateten katak jornalistas Timoroan labele subar informasaun importante ne’ebe povu presiza hateten.
“Ami hare katak ida ne’e sai hanesan xave profesionalismo jornalismo ninian ne’e mak ami hili tema ba kongreso AJTL nian mak konsolidasaun instituisaun atu hametin profesionalismo.”
Iha Congresson AJTL ba dala rua hili mos estrutura foun assossiasaun nian ne’ebe sei lori no lidera organizasaun ba oin ba periodo 2011-2014; AJTL nia Prezidente foun Tito Felipe, Vise Prezidente Virgilio Guterres, no Sekretario Jeral Alex Assis.
Durante Congresso ne’e mos konvida konvidadus espesial atu hato’o sira nia perspektiva oin oin kona ba dezefius no oportunidades ba media iha Timor-Leste.
Fundador Southeast Asian press Aliane (SEAPA), Kavi Clukitavaro, ne’ebe partisipa mos iha kongresso AJTL hateten jornalista Timoroan tenki treino maka’as bele hasai informasaun oinsa kona ba ASEAN tamba atu tama ba ASEAN laos hare husi riku soin rai nian maibe mos informasaun hotu ne’ebe mak bele fo influensia maka’as par abele lori Timor Leste sai hanesan membru ASEAN .
“Hau husu ba jornalista Timoroan hotu tenki hakerek barak informasaun hotu kona ba ASEAN para bele lori lalais Nasaun Timor Leste ba ASEAN,” nia husu.
Entretantu tuir Presidente Commission A, Parlamentu Nasional, Fernanda Borges, ne’ebe mos marka prezensa iha Congresso nudar konvidade espesial koalia kona ba responsabilidade Parlamento ba Promove Liberdade Espressaun.
Deputada Borges refere iha nia diskurso kona ba materia Liberdade da Espressaun no Impresa iha Konstitusaun Republika Demokratika Timor Leste, Artigos 40 no 41, no mos kona ba Lei Internasional Universal Direitus Humanos Artigo 19.
Iha okaziaun ne’e Deputada Borges foka liu kona ba nesessidade atu hakerek Lei Liberdade Assessu Informasaun atu garante katak jornalistas no ema deputadus no mos povu tomak iha oportunidade atu hetan informasaun no ida ne’e garante hosi lei ruma atu nune ofisiais publiku la bele subar informasaun.
“Signifika katak Direitu atu fo sai no direitu atu simu informasaun, fo sai, imi Jornalista fo sai povu iha direitu simu. Ami Deputadu Deputada mos iha direitu atu fo sai informasaun no simu informasaun hodi bele halo Governo iha transparensia ba povu hotu nia diak no iha boa Governasaun,” hateten Deputada Borges.
Kona ba Lei Ruma atu regula media Deputada Borges hateten katak la iha nesessidade atu Parlamentu hakerek lei ruma atu regula media nune katak media rasik mak tuir los regula nia aan rasik maibe ba ida ne’e media mos presiza iha unidade no koalia ho lian ida deit.
Nis mos fo hanoin ba media ne’ebe marka prezensa katak tempu mos lau dadauk ona no ho mudansa lejislatura iha 2012 bele mos muda hanoin atu husik media mak regula nia aan rasik.
