Estudante Departamentu komso Ameasadu la pasa Ezame Final Estudante balun hosi Departamentu Komunikasaun Sosial (DKS) iha Universidade Nasional Timor Lorosa’e (UNTL) la konkorda ho desizaun departamentu atu teze ikus tenki ser hakerek ho lian Portugues, tanba estudantes barak nia konhesimentu kona ba lian Portuguese sei minimu.
Quiteria Soares, estudante DKS, semester neen, la konkorda ho desizaun departamentu nian tanba durante prosesu aprendizajen material principal hotu–hotu hanorin ho lian Tetun.
“Hahu husi semester primeiru to’o agora materia hanorin ho lia Tetun maibe to’o ikus hakerek fali ho lian portugues, entaun ha’u sente estudante barak sei falla harerek teze” dehan estudante Soares, iha Kampus Kaikoli, UNTL, Dili, semana kotuk.
Nune’e mos estudante ne’e sujere ba universidade atu hakerek teze ho lian Tetun tanba iha Konstituisaun Republika Domokratika Timor Leste (RDTL) mos garante lian Tetun hanesan lian ofisial hamutuk ho Portugues.
Iha fatin hanesan, Dosente Lian Portugues DKS, Maria de Carvalho, rekonese katak, konhesimentu estudante sira liu-liu ba semester neen nian ba Lian Portugues sei minimu tebes, tanba ne’e husu ba Universidade atu tetu didi’ak antes deside hakerek teze ho Lian Portugues.
“Hanorin ho lian oin-oin ne’e sai hanesan problema ba estudante sira bainhira hakerek teze,” tenik nnia.
Dosente de Carvalho hatutan tan katak bainhira hakerek teze iha Lian Portugues Professor sira no Xefe Departamentu tenke tuur hamutuk hodi ko’alia. Labele ema ida mak deside mesak, tenke koordena ho estudante sira, tanba alunus sira mak halo pratika la’os professor.
Relasiona ho assuntu ne’e Xefe DKS, Filomeno Jaques Fernades, hateten atu remata kursu estudante sira tenke hakerek iha Lian Portugues tanba ne’e normas ne’ebe funsiona iha Departamentu Komunikasaun Sosial.
“Se imi halo iha lian Tetun ha’u sente difisil atu korrije, tanba seidauk iha professor ruma ne’ebe mak hasai kursu iha lian ne’e tanba ne’e tenke esforsa aan,” katak Xefe Departamentu Fernandes.
Jornalista tenta konfirma desizaun ne’e ba iha Vise Reitor asuntu Akademiku, Miguel Maia, maibe nia laiha fatin halo viajen ba estranjeru.
Departamentu komunikasaun social hanesan Departamentu foun iha Universidade Nasional Timor Lorosa’e (UNTL) ne’ebe loke iha tinan 2008 ho total estudante hamutuk 100. Iha inisiu Departamentu ne’e hamahon-an iha Fakuldade siensia Edukasaun nia okos, maibe iha tinan 2011 transfere ba iha Fakuldade Siensias Sosial.
