Membru Parlamentu Nasional, Komisaun C, trata Asuntu Economia, Finansas, no Anti Korupsaun, hateten katak, sistema merkadu livre katak wainhira importasaun sasan menus mak folin sasan iha merkadu folin aumenta.
“Merkadu livre ne’e kuandu koto menus, osan barak, koto nia folin sae. Material konstrusaun sementi menus Roh la mai oituan deit iha armajen folin sae,” hateten Deputadu Manuel Tilman, iha Parlamentu Nasional, Dili, semana kotuk (12/10).
Deputadu Timan esplika tan katak iha buat balun nebe mak krimi hanesan espekulasaun .
“Ne’e hanesan ne’e, sasan iha hela maibe hau hatene katak ro semana ida ro la mai entaun sasan sira tama uluk tiha ona envesde fa’an tuir folin uluk nian lae, komo ro la tama mai sira halao buat ida naran espekulasaun,” hateten Deputadu Tilman.
Nia hateten tan katak wainhira “ema hotu hotu persija entaun hau mesak mak iha hau aumenta nia folin. Ida seluk mak ita nia sasan nia folin mak sidauk los. Ba deit Lita Store nia oin, hau nia kondutor mak ba hola hudi sasuit ida Dolar ida, hau mak hola hodi sasuit ida dolar rua.”
Nia hateten tanba mental negosiante nian ida ne’e mak fo impaktu ba produtu rai laran sae makas.
Entertantu Deputadu Lucas da Costa hateten katak, Merkadu Livre la signifika katak Merkadu fuik, livre mais tenki sivilijadu.
“Iha ita nia merkadu ne’e hahalok balun mak sai tiha fuik ona, maibe la iha mundu merkadu ida merkadu livre maibe fuik, ne’e signifika katak, bele merkadu ne’e livre maibe iha kontrola nafatin,” hateten Deputadu da Costa.
Tuir Depudatu ne’e mos katak merkadu livre signifika kompetisaun livre (Persaingan bebas) maibe livre ne’e mosu ho regra ida.
“Teoria merkadu Livre ne’e komesa iha Amerika, sistema kapitalista mak advoga, defende merkadu livre ne’e.”
Deputadu da Costa haktuir katak Amerika iha merkadu livre maibe atu kontrola iha merkadu livre ne’e iha regulamentu ida hanaran Anti Trust.
“Anti Trust ne’e para atu kontrola, hahalok ho hanoin ema sira iha merkadu ne’e para sira labele sai fuik.”
