Relasiona ho koperasaun bilateral entre gorvernu Timor-Leste ho Governu Brazil kona ba dezenvolvementu observatorio merkado de traballho, Sekretaria Estadu ba Formasaun Profesional no Empregu (SEFOPE) hetan apoiu ekipamentus IT (Informasaun Teknolojia) husi Governu Brazil tanba ekipamentus sira ne’e inportante tebes ba SEFOPE atu bele rai dadus no informasaun merkado de traballho nian.
“Ita nasaun foun presiza apoiu no Governu Brazil nia tulun ne’e inportante tebtebes ba ita” dehan Bendito Freitas, SEFOPE, (13/10) iha salaun inkontru SEFOPE, Kaikoli Dili.
Sekretariu Estadu (SE) SEFOPE Freitas hatutan katak ekipamentus ne’ebe apoiu husi Governu Brazil ne’e inportante tebes hanesan komputador balun, servidor ida, fotocopiadora.
Alende ekipamentus, Governu Brazil mos apoiu pesoal tekniku hosi Brazil ida atu bele fo asistensia kapasitasaun ba funsionario sira atu bele servisu ho responsabilidade iha area produsaun, liu-liu konaba mundu merkado de traballho iha nasaun Timor-Leste.
“Ita hein katak ajudus sira ne’e ita bele uza ho diak atu bele favorese ita nia servisu liu-liu kona ba area espesifika observatorio merkado de traballho nian” SE Freitas espera.
SE ne’e hatutan tan katak Koperasaun Governu Brazil ho Governu Timor-Leste ne’e forte teb-tebes katak realidade ne’ebe iha hanesan sentru nasional formasaun professional SENAI Bekora ne’e hetan apoiu makas husi governu Brazil. No agora dadaun forma ona jovens liu dois mil formadus iha area oin-oin hanesan konstrusaun Civil, carpintaria, elektrisidade, kostura industrial, verifikasaun no mekanika motorizada.
Iha parte seluk formasaun merkado de traballho mos importante tebes atu bele dezenvolve sistema produsaun no difuzaun relasiona ho mundu merkado de traballho nasaun Timor-Leste nian.
Entertantu reprezentante Embaixada Brazil iha Timor-Leste, Edson Marinho Duarte Monteiro, hateten katak apoiu ne’ebe Governu Brazil fo ba SEFOPE ne’e hanesan apoiu solidaridade ida husi koperasaun Brazil ho Timor-Leste hodi bele faselita servisu SEFOPE nian konaba dezenvolvimentu no observatorio merkado de traballho nasaun Timor-Leste.
“Koperasaun Governu Brazil ho Governu Timor-Leste ne’e la os foin hahu mas hahu kedas iha tinan 2002 no Governu Brazil la os apoiu deit SEFOPE maibe ba ministerio seluk mos,” dehan Reprezentante Embaixada Brazil Monteiro.
