Tribunal Distrital Dili hamonu pena suspensaun tinan 1 ba arguido kazu Violensia domestika ne’ebe komete husi kondenadu sebastiao dos Santos hasoru lezada OM iha Distritu Ermera .
“Mesmu pena ne’ebe mak hamonu ba arguidu seidauk adekuado , maibe JSMP espera katak pena ne’ebe mak kondenadu hetan pelumenus bele educa kondenadu hodi labele repete tan ninia hahalok ne’e iha futuru no sai ezemplu ba komunidade seluk, hodi kumpri provizaun lei kontra violensia domestika ne’ebe defini krime violensia domestika hanesan actu krime ho natureza hanesan krime publiku,”hateten Diretor Programa Monitorizasaun Sistema Judisial (JSMP ) Luis Oliveira Sampaio iha nia knar fatin Colmera, Dili.
Tuir Diretor JSMP ne’e katak Tribunal nia avaliasaun tomak konklui katak kondenadu provadu komete krime ofensas korporais simples hasoru ninia konjuje , Tribunal mos deklara katak kazu ne’ebe kondenadu komete , priense rekezitus ne’ebe mak defini iha artigu 145 kodigu penal ne’ebe dehan katak se mak ofende ema seluk nia isin ka saude sei hetan pena prizaun to’o tinan 3 ka multa.
Faktus sira ne’ebe deskobre durante audensia julgamentu iha tribunal hatudu katak, iha loron 06 Dezembru 2009 , kondenadu ne’ebe nudar lezada nia kaben, haksesu malu ho lezada tanba osan folin husi karau ida ne’ebe sei deve hela ba lezada , tanba ne’e kondenadu buti ninia kakorok no riba nia ba rai no halo lezada hetan metan iha ninia kakorok no nia liman .
Bazeia ba monitorizasaun JSMP nota katak Tribunal esplika katak iha Timor Leste hahalok hanesan ne’e sempre akontese tanba iha oportunidade , no iha 2010 iha ona lei kontra Violensia Domestika , no husu ba kondenadu atu la bele komete tan krime hanesan no mos krime seluk durante tempu suspensaun,kuandu kondenadu repete tan sei kumpri pena ne’ebe mak tribunal hamonu ona ba nia durante fulan rua iha komarka.
Entertantu tuir Diretora Rede Feto Yacinta Luzina katak TL iha ona lei Violensia Domestika no ema hotu tenke hakru’uk ba lei.
“Ami hanesan organizasaun ida ne’ebe durante ne’e luta ba direitu feto nian, halo suspensaun ba kazu sira hanesan ne’e ami triste tebes, lolos labele hanesan ne’e tanba ida ne’e hanesan ita la fo atensaun ka lahalo tuir saida mak hateten ona iha lei ne’e, tuir lei lolos pena prizaun tinan 3,nune’e kondenadu labele halo tan bainhira nia livre,”nia komenta.
