Relasiona ho lei eleitoral foun ne’ebe Comissão Nacional para as Eleições (CNE) inplementa katak elisaun tinan 2012 fo liu oportunidade bo’ot ba partisipasaun feto partido politika sira atu hatudu sira nia performance iha vida politika. Nune katak partisipasaun feto iha vida politika sei aumenta makas iha tinan oin mai.
“Partido FRETILIN hanesan partido ida bo’ot tebtebes entau nia kandidataura prepara kedas ona tanba Lei ida agora ne’e fo liu prioridade ba feto politika sira iha vida politika ne’e makas liu,” hateten Deputada Josefa Alvares Soares, FRETILIN, foin daudauk (10/10), iha Parlamentu Nasional, Dili.
Tuir Deputada Soares katak lei eleitoral iha tinan uluk halo previsaun entre kandidatus nain lima tenke iha feto ida, maibe lei eleitoral foun nee’be agora dadaun CNE implementa ona iha elisaun tinan ida ne’e hanesan fo vantajen bo’ot ba partisipasaun feto politika sira atu kandidata an iha elisaun tinan 2012 signifika katak kandidatus nain hat tenke feto ida se rua diak liu tan atu bele alkansa iha vida politika tanba ne’e mak partidus politikus hothotu luta ba level partisipasaun feto iha vida politika hahu makas.
Entretantu tuir Deputada Getrudes Monis, Partido Demokrata (PD), katak partido hotu hotu tenke aprezenta kandidatura tuir lei ne’ebe CNE iha katak partido politikus iha kandidatu nain hat tenke iha feto ida entau partidos politikus hotu hotu tenke hakruk ba lei ne’ebe Parlamentu Nasional aprova.
Deputada Monis hatutan tan katak partidos hotu hotu sempre preparado atu aprezenta kandidatura feto iha elisaun 2012 no PD mos tenke aprezenta kandidata feto partidos politika sira tuir lei nee’be iha.
“Ami preparado atu tama iha lista kandidatura,” dehan Deputada PD Monis.
