Postu seguransa tranzitu ne’ebe monta iha Kapital, Dili, iha fatin xafe iha sidade laran atu ajuda kontrola movimentu kareta ne’ebe aumenta ba bebeik oras ne’e abandonado hela tanba falta rekursu umanus iha Polisia National Timor-Leste (PNTL) atu bele tau iha fatin hira ne’e hotu.
“Hau lamenta teb-tebes ho kondisaun ida ne’e tanba jeralmente uza osan estadu nia atu halo postu sira ne’e maibe la uza no sai abandona,” hateten Deputadu David Dias Ximenes, hosi Komisaun B iha Parlamentu Nasional semana kotuk.
Deputadu Ximenes hateten tan katak polisia tranzitu nia servisu la dun klaru tanba tuir los hirak ne’ebe iha uza atu kontrola tranzitu no mos hanesan sinaleiru para bele kontrola sinais tranzitu no movimentu kareta bainhira lampu trafiku mate-lakan ka mate tanba ahi mate.
Hatan ba kestaun ne’e Komandante Nasional Polisia Tranzitu, PNTL, Inspektor Xefe, Antonio da costa Soares hateten postu sira ne’e la’os abandona maibe polisia tranzitu sira halo vizilansia iha oras balun deit tanba rekursu umanus iha nia unidade sei limitadu.
“Ita iha postu seguransa pur volta 20 e tal no iha postu balun ne’ebe mak ami konsege kobre maibe iha balun la konsege tanba iha limitasaun rekursu umanus no ami koloka sira atu fo vizilansia temporariu ka oras balun deit,” hateten InspektorXefe Soares.
Nia hatutan tan katak kolokasaun polisia tranzitu ba postu seguransa seidauk sufsiente maibe garantia katak ba oin sei esforsu atu aumenta tan pesoal polisia tranzitu nune’e bele kobre postu sira ne’e hotu.
“Los duni kolokasaun elementus ba postu sira ne’e seidauk sufsiente tanba pesoal polisia tranzitu sei fahe tan ba seksaun balun entaun sira ne’ebe mak iha ona postu sei koloka fali hodi halo atividade seluk, tanba ne’e dalaruma ita hare postu hirak ne’e husik mamuk hela.”
Komunidade ida naran Inocencio [apelido la fo sai] hateten kestaun ne’e mosu tanba falta kordenasaun entre Diresaun Nasional Transporte e Terestres (DNTT) no polisia tranzitu tanba ne’e to’o agora abandona hela no la’os sai fatin ba polisia maibe sai fatin jeral hodi ema pinta tun sa’e tuir nia hakarak.
“Tuir hau nia hare katak ida ne’e mosu tanba falta kordenasaun husi DNTT no polisia tranzitu tanba fatin ne’e halo tiha maibe la uza signifika katakita gasta osan estadu nian no laiha planu ne’ebe serteza,” nia dehan.
