Ema ne’ebe lao ain iha Kapital Dili ohin loron dalabarak preokupa kona-ba konesementu kondutor no motorist sira nian ba zebra cross ka passadeira.
Dala ruma kondutor no motorista sira la fo oportundade ba sira atraveza estrada maske sira hamriik ona iha linha passadeira nia laran.
Hatan ba kestaun ne’e, Xefe Interinu Asidente Trafiku Abel da Conceiçáo hateten kondutor sira antes atu hasai Karta Kondusaun tenke liu teste ne’ebe Diresaun Nasional Transporte e Terestres (DNTT) fo ne’e inklui koko konhesimentu kona ba sinais tranzitu ne’ebe iha.
Maibe, haktuir Xefe Inerinu da Conceição, dalaruma kondutor sira la fo fatin ba ema lao ain sira tanba sira seidauk tau iha konsiensia importansia ba funsaun passadeira ba ema ne’e lao ain.
Alarico Martins, estudante universitariu ne’ebe lor-loron utilize estrada sempre hasoru difikuldade bainihra hakat estrada sorin ba sorin seluk. Nia heteten katak dala ruma nia atraza atu tuir aula eskola tanba dala ruma kondutor sira la fo tempu atu sira bele hakat liu.
“Ita atu atraveza ba estrada sorin araska loos tanba kondutor no motorist sira la fo fatin atu ita bele hakat ba estrada sorin,” preokupa Alarico Martins, semana kotuk iha Kaikoli, Dili.
Iha fatin seluk Xefe Inspetor Tranzitu Nasional, Antonio Lourenço Soares, hateten polisia tranzitu servisu hamutuk ho UNPol hodi fahe informasaun kona-ba sinais tranzitu sira liu-liu kona-ba zebra cross ka passadeira, liu husi fahe pamfletu, broxura no fo edukasaun sivika ba komunidade sira e mos liu husi autoplante atu bele fo esplikasaun diak.
“Iha estrada sira lor-loron sempre akontese asidente tanba kondutor sira l aiha konsiente atu fo prioridade ba ema lao ain sira atu ultra pasa ba sorin.e dalaruma mos ema lao ain sira laliu husi lina zebra cross,” Soares dehan.
Iha sorin seluk taxista Mario da Silva hateten lina mutin ne’ebe iha estrada ne’e atu fo tempu ba ema lao ain sira atu ultrapasa ba estrada sorin no tenke atensaun ba traffic light (lampu merah).
Taxista ne’e mos hateten katak kondutor no motorista sira ne’ebe la fo tempu ba ema la’o ain sira iha lina zebra cross, dalaruma ema ne’e foin mak aprende lori kareta e laiha konesementu diak kona-ba zebra cross.
