Estrada rural ne’e nia rohan ida, 700 metrus, naksobo tinan sanulu liu ba hafoin rai halai. Iha tinan barak nia laran bis, kareta trek no motor iha difikuldades bo’ot atu liu hosi dalan aat ne’e no mos halo komunidade Weberek sai izoladu.
Tanba nesessidade komunidade Weberek nia 200 uma-kain, Administrador Distritu Manufahi no autoridades lokal seluk identifika reabilitasaun estrada Weberek nudar prioridade ida ba sektor agrikultura iha area ne’eba.
Dalan foun ne’ebe hetan reabilitasaun lori benefisio barak ba komunidade Weberek liu hosi fo asesu ba edukasaun, sentrus saude, no mos assessu ba merkadu seluk hanesan iha Dotik atu komunidade bele ba faan sira nia produtus agrikultura nian.
Administrador Manufahi, Filomeno Tilman, hateten no hato’o ba Uniao Eropa nia tulun no ajuda durante ne’e komunidade nia agradese bo’ot.
“Hau agradese ba Embaixador no mos tim lider programa dezemvolvimentu iha area rurais. Dalan ida ne’e [hosi] 2003 infrenta difikuldade barak e foin dadauk ne’e mak foin resolve,” hateten Administrador Tilman.
Ministerio Agriculture no Pescas Governo Republika Demokratika Timor-Leste ho Uniao Europa halo programa kolaborasaun hodi hamenus ema nia kiak no suporta dezenvolvimentu sosial no ekonomiku haree liu liu ba areas ne’ebe ekonomia menus liu iha Timor-Leste nia laran.
Projektus iha program ida ne’e nia laran mak nia objectivu atu aumenta produsaun agrikultura no halo mudansa ba komunidade nia moris lor loron hanesan hadia estrada, irigasaun, no mos aumenta kapasidade ema ne’ebe servisu hodi servi publiko iha nivel Distritu.
Tuir Press Release ne’ebe fo sai hosi Uniao Europa no Ministerio Agricultura no Peskas, Programa Dezenvolvimentu Area Rurais (RDP3) mak faze terseiru husi programa estrategia dezenvolvimentu rurais ne’ebe hahu iha 2006 hahu iha Governo anterior nia tempo no hetan suporta husi Uniao Eropa.
RDP3 agora hakarak atu koko implementa projeto iha Distritu Manufahi atu nune’e bele sai modelo efetivo ba Distritu seluk, tamba Populasaun iha Distritu Manufahi liu 30.000 abitantes.
RDP3nia pakote total 10 milioes Euros durante tinan 4,5 nia laran Fokus liu iha Distritu Manufahi hodi suporta servisu Ministerio Agrikultura no Peskas no mos Ministerio Infraestrutura hahu husi tinan 2009 to’o 2013.
Iha okaziaun vizita ba inaugural estrada Weberek iha Distritu Manufahi, Embaixador Uniao Europeia ba Timor-Leste, Juan Carlos Rey, hateten katak nia vizita Manufahi dala barak ona no nia senti impressionado ho dinamisno hosi komunidade Distritu Manufahi.
“Hau hakarak dala ida tan hato’o hau nia obrigado barak ba komunidade Weberek no imi nia boas vinda ho ksolok mai hau no mos ba ekipa tomak Uniao Europa nian, ba ekipa programa de Dezenvolvimento Rural No.3. Hau mos hakarak hato’o hau nia obrigado ba Xefe Distritu no Xefe Suku no em jeral ba Ofisiais Ministerio Agricultura no Peskas no Ministerio Finansas, no liu liu ba populasaun lokal Weberek nian.”
