“Hau nia observasaun nebe hau halo iha semana liu ba iha Ermera hau sae ba Atsabe, hau para iha Lauana, reabilitasaun dalan ida ne’e kona Letefoho nian sae ba Atsabe maibe to’o deit iha Lau-Ana kafe laran maibe atu sae ba subida para,” hateten Deputadu Aderito Hugo iha parlamentu Nasional, Dili, semana kotuk (13/10).
Tuir Deputadu Hugo katak karakter atu reabilitasaun ba estrada mak dudu estrada halo kaber, la hare ba deinajen, la bok ne’e la rezolve problema.
“Hau la konkorda Deputadu Joaquin, la os tinan hat halo reabilitasaun ba estrada maibe tinan sia nia laran,” hateten Deputadu Hugo.
Nia haktuir tan katak reabilitasaun Estrada mak la halo pakote sei la rejolve problema .
“Udan mai agora dalan trousu Letefoho, Lauana, ida nebe kaber ona to’o deit iha Kafe laran iha subida para ne’e, ita la aproveita nafatin tanba dudu deit mak estrada la hare ba dreinajen.”
Entertantu tuir Deputada Josefa Soares hateten katak, nia rona informasaun katak, estrada Ermera ba Atsabe atu loke tan maibe to’o agora lori rai mean mak fakar deit iha Estrada.
‘Rai ida ba tate ne’e laos rai ida kaulidade ninian ne’e lae, rai mean deit mak fakar ba,” hateten Deputada Soares.
Tuir nia katak wainhira udan mai rai mean sira ne’e sai taho bot hodi difikulta ba transportes sira nebe liu ba mai.
“Tanba ne’e mak hau hakarak nia esplikasaun ba estrada ne’e,” Deputada da Costa hato’o.
Entertantu Sekretariu Estadu Obras Publikas Domingos Caero hateten, estrada Ermera ba Atsabe la os obras publika la preve orsamentu maibe tuir deklarasaun husi komunidade nian katak, importante ba sira mak Estrada, wainhira Governu hadia estrada sira sei la husu kompensasaun.
“Depois na realidade to’o iha neba, dala ruma kafe musan monu iha estrada moris fila fali ne’e mos sira husu para kompensasaun,” hateten SE Caero relasiona ho deklarasoens hosi Deputadus iha Parlamentu Nasional.
Nia hateten hafoin dada malu ho kestaun ne’e Obras Publika nian hateten duke projetu paradu diak liu lao ho ida nebe eziste ne’e.
