Diretor Nasional Konservatoriu Rejistu Sivil Vitor da Costa Neto hateten oras ne’e dadaun iha labarik barak mak seidauk hetan sertidaun RDTL tanba inan-aman la fo importansia.
“Dalabarak inan-aman sira seidauk iha konsiensia kona-ba importansia sertidaun do nascimentu, iha komplikasaun bainhira inan-aman sira atu fo naran hodi rejistu,e mos tanba inan barak mak partus deit iha uma,” hateten Diretor Neto semana kotuk (05/10) iha Kaikoli,Dili.
Kona-ba bebe ne’ebe moris iha ospital, nia dehan sira monta ona sira nia staf ida iha Ospital Nasional Guido Valadares (HNGV) hodi rejistu labarik ne’ebe moris iha ospital.
“Ami agora harii ona postu rejistu sivil iha ospital e ami iha pesoal ida deit mak halo atendementu iha ne’eba e total bebe ne’ebe hetan ona sertidaun do nascimentu hafoin moris husi 2008 to’o 2011 hamutuk 2000,”Neto informa.
Diretor Neto hatutan, staf husi Diresaun Conservatoriu Rejistu Sivil halo ona sosializasaun ba iha komunidade sira atu oinsa mak sira bele rejistu sira nia oan nia naran iha rejistu sivil hodi hetan sertidaun nascimentu bainhira partus tiha.
Tuir nia, agora Ministeriu Justisa liu husi Diresaun Conservatoriu Rejistu Sivil iha ona planu atu harii tan postu rejistu sivil iha Distritu 3 tan,mak Distritu Baucau, Bobonaro no Distritu Oe-Cusse iha tempu badak.
Iha lidun seluk Diretor Centru Saude Formoza (CSF) Jaime dos Reis Belo hateten nia parte hetan ona orientasaun husi diresaun rejistu sivil nian katak bainhira inan sira partus tiha iha sentru saude ne’e, inan-aman sira tenke ba rejistu oan nia naran iha diresaun ne’e hodi hetan sertidaun do nascimentu.
“Lolos atende iha ne’e maibe ami nia fatin mak la sufsiente atu atende prosesu rejistu sivil, ami so ense deit data moris bebe nian fo ba inan-aman sira e sira mak ba halo sertidaun RDTL iha Ministerio Justisa,” Belo dehan.
