Estudantes Fakuldade Enjenharia, Universidade Nacional Timor Lorora’e (UNTL), Kampus Hera, keixa katak difikuldades transport hosi Dili ba sira nia fakuldade difikulta sira nia aprensizajen lor-loron.
“Ami sempre hetan difikuldade ba kareta ne’ebe ami sa’e tanba iha kareta rua deit. Ami sente la sufsiente no ami ba tuir aula tarde hela deit,” hateten Rozito [apelido la fo sai] estudante husi Fakuldade Enjeneria, Departementu Elektronika, iha semana kotuk (03/10) iha kampus sentral, Dili.
Tanba ne’e nia husu ba parte kompetente iha universidade nasional atu tau matan ba estudante sira husi Fakuldade Enjeneria nune’e labele impede sira ba tuir sira nia estudus.
Entretantu tuir estudant Filomena da Cunha husi Departementu Elektronika katak nia lamenta ho kareta trek ne’ebe universidade oferese hodi tula sira ba eskola iha sira nia Kampus iha Hera.
“Hau lamenta tanba hau hanesan estudante feto ida ba eskola sempre sa’e trek ba eskola,’ estudante Cunha hateten.
Estudante ne’e mos apela ba universidade nasional atu tau atensaun ba sira nune’e la bele impede sira bainhira ba eskola.
Kona ba assuntu ne’e, Vise Reitor Miguel Maia, Assuntus Akademikus, UNTL, hateten katak universidade hatene difikuldades mak estudante sira infrenta dadaun.
“Ami sempre buka meius hodi hatan preokupasaun estudante sira nian e parte edukasaun fo impresta trek rua atu sira bele uza hodi hein hela prosesu bis UNTL nian ne’ebe segundu maun. La signifika katak ho trek rua ne’e resolve ona problema,” hateten Vise Reitor Maia.
Vise Reitor ne’e haktuir tan katak kazu bis segundu maun ne’e agora tama ona iha tribunal e hein deit desizaun husi tribunal atu determina faktus kazu ne’e.
“Prosesu ne’e hein deit bolu husi Justisa atu hasouru parte administrasaun nian.”
