Tuir fiskalijasaun nebe mak mem bru parlamentu komisaun G halo iha Maubara katak, moru (tembok penahan) ne’ebé mak kompania sira halo iha Maubara la iha kualidade tanba agora monu tiha fali.
“Ba ha’u projetu ne’e foin mak fulan rua maibé monu hotu tiha ona,ne’e kompania sira nebe iha ne’e loro-loron buka nafatin oportunidade ne’e mak halo,”hatéten Deputadu Inacio Morera iha plenaria Parlamentu Nasionál , semana kotuk (3/10).
Tuir nia, kompania ne’ebé kaer projeitu ne’e mak kompania Gonisep no kompania BTK e husu ba sira atu responsabiliza ba obra ne’e.
“Ha’u hanoin ita labele husik hela de’it hanesan ne’e,tanba moru ne’e foin mak halo iha tasi ibun ne’e, maibé agora monu hotu tiha ona, ne’e oinsa kompania tenke responsabiliza,” nia dehan.
Entertantu Deputada Tereza de Carvalho haforsa katak, moru ne’e rasik kompania halo foin halo fulan rua maibé monu fali ona tanba laiha kualidade.
“Tasi been baku ba mai moru monu hotu e agora tasi been sa’e to’o iha estrada ona,”nia kestiona.
Tuir nia, moru ne’e monu tanba mihis liu,tau semente ba rai henek de’it ba entaun ne’e monu lalais de’it tanba la metin.
Tanba ne’e husu ba governu liu-liu Ministeriu kompetente atu hare moru ne’e,Deputada ne’e husu.
Enkuantu Prezidente Komisaun G Parlamentar Pedro Martires da Costa rekonese katak obra ne’e laiha duni kualidade tanba governu ladauk aprezenta dezenu ne’ebé diak ba kompania ne’ebé kaer projetu ne’e.
“Ami komisaun G ,ami mós hola parte iha Governu AMP nian rekonese katak ida ne’e frakeza ita nian “Pedro rekonese.
Pedro dehan,ba oin tinan ikus ne’ebé mak Governu AMP ukun tenki halo ho kualidade .
“Tinan ikus nebe mak AMP ukun ,ami husu atu halo tu-tuir saida mak iha planu estratéjiku dezenvolvimentu nasionál,halo estrada nia fundasaun tenke fatuk, tau silindru, tau alkatraun ,no mós halo moru protesaun atu nune’e garante kualidade,”Pedro tenik.
Nia sublina katak, se wainhira Governu fo fiar demais ba emprejarius sira halo uluk ho sira nia osan ne’ebé mak iha depois kobra mai ita ho osan nebe bot maibé la iha kualidade.
“Ne’e frakeza Governu ida ne’e ninian e ha’u mós rekonese frakeza ne’e,”nia katak.
Tuir Pedro katak, iha orsamentu jeral du estadu 2012 mai iha Parlamentu, sira sei ejizi wainhira halo obra ida tenki ho kualidade.
