Tuir fiskalijasaun ne’ebe mak membru Parlamentu Nasional halo iha distritu 13 nota katak, ema kontinua sunu rai hodi estraga ai horis no ai maran sira maibe la iha intervensaun husi guarda florestal sira.
“Guarda Florestal sira ne’e hau la hatene,Governu tau sira mak atu prende ai maran deit ga oinsa,”preokupa Deputadu Francisco de Araujo, semana kotuk (27/09) iha plenaria Parlamentu Nasional.
Tuir observasaun ne’ebe mak deputadu Francisco hetan katak, ema komesa sunu rai iha foho lolon sira no mos iha estrada ibun sira hanesan akontese ba ai horis sira ne’ebe kuda iha Hera,Manatuto,Aileu no Maubise,kuaze ke sunu mos tiha.
Preokupasaun hanesan mai husi membru Komisaun D Parlamentar Deputadu Adriano Joáo hateten horas ne’e dadauk Ministeriu Agrikultura liu husi Departementu Florestal halo ona rekrutamentu ba guarda florestal hodi kontrola ba area hirak ne’ebe mak populasaun gosta sunu.
“Husi Ministeriu Agrikultura no Meiu Ambiente halo ona sosializasaun ba komunidade atu labele lere to’os, lere ai iha rai lolon no fatin ne’ebe besik estrada, besik bee matan nune’e labele fo impaktu ba bee matan maran,” Adriano dehan.
Maibe governu tenke koloka pesoal husi guarda florestal sira iha Sub-distritu hotu-hotu hodi kontrola komunidade sira atu labele sunu no tesi ai arbiru.
Tuir nia, durante ne’e guarda florestal sira ladun halo kontrolu ba komunidade sira ne’ebe sunu rai arbiru tanba pesoal Guarda Florestal ne’ebe limitadu,menus radio komunikasaun no menus transportes.
Tanba ne’e,nia dehan iha Orsamentu Jeral 2012 nian, komisaun sei haka’as aan oinsa par abele tau orsamentu ba Ministeriu Agrikultura ne’ebe barak nune’e sir abele halo rekrutamentu ba pesoal guarda florestal.
Entretantu bainhira jornalista koko konfirma asuntu ne’e ba iha Diretor Nasional Guarda Florestal Luis Godinho maibe la konsege tanba Diretor laiha fatin.
