Konfederasaun Sindikatu Traballador Timor-leste (KSTL) servisu hamutuk ho Sekretariu Estadu Formasaun Profesional e Empregu (SEFOPE) haruka tan formandus na’in 50 ba iha Jakarta hodi aprende area maritime nian.
“Ba ida ne’e faze terseiru ona tanba tinan kotuk ami haruka ona 25 pesoas ba uluk ,e agora dadauk ami haruka tan 50 pesoas,” hatéten Sekretariu Jeral KSTL,Rigoberto Monteiro,semana kotuk (03/10) iha Farol,Dili.
Nia dehan, formandus na’in 50 ne’ebé desloka ba iha Jakarta ne’e hetan suporta husi SEFOPE, Sekretariu Estadu Rekursu Naturais (SERN) no governu Norwegia.
“Objetivu bo’ot liu mak atu prepara ita nia traballador sira ne’e para bele servisu iha setor maritima espesifiku liu sai hanesan pelaut ida durante fulan ida resin,”Rigoberto dehan.
Total orsamentu ba atividade ne’e husi SEFOPE iha US$ 30 mil, SERN apoia US$ 37 mil e tal,ami ho Norwegia iha US$ 17 mil no ITE iha US$ 9 mil e tal.
“Orsamentu hirak ne’e sira uza ba selu eskola,han-hemu inklui selu sira nia viajen ba mai durante fulan ida resin ne’e,”nia esplika.
Tuir nia, formandus sira ne’e alende membru KSTL rasik mós balun peskador sira no balun uluk eskola iha Indonezia kona-ba Akademi Pelayaran no balun mós uluk servisu iha tasi Timor nian.
Entertantu Sekretariu Estadu Formasaun Professional e Empregu (SEFOPE),Bendito Freitas hatéten ,formasaun ida ne’e importante no wainhira sira fila mai preparadu ona kona-ba setor maritime nian nebe kapasitadu ona pronto atu servisu ligasaun ba ro nian.
“Tanba ne’e mak ami ohin hamutuk ho Sekretariu Estadu Rekursu Naturais fo kontribuisaun ba sira hodi kontribui sira nia formasaun,” nia dehan.
Bendito akresenta katak,formasaun ne’e importante tebes ba trablahdor Timor hodi hasae sira nia kapasidade oinsa bele servisu iha nia rai laran.
“Ita labele husi ema husi liur mai domina fali ita nia kampu de trabalhu tan de’it buat ida ne’ebé ita bele halo,” Bendito dehan tan.
